Bil Klinton, kao bivši predsjednik ili "prvi gospodin"?

Ako SAD u utorak dobiju Hilari Klinton za prvu ženu predsjednicu, postavlja se pitanje kako će oslovljavati ubuduće njenog supruga, inače, bivšeg predsjednika Bila Klintona.

Riječ je, prenosi Hina, o dvostrukoj istorijskoj novini.

Nijedan muškarac nije ušao u Bijelu kuću kao suprug predsjednice i nikada bivši predsjednik nije bio oženjen predsjednicom.

"Prvi gospodin" je titula koja bi se mogla nametnuti u neslužbenom obliku, procjenjuju stručnjaci, dodajući da "prvi suprug" ili "prvi muškarac" ne zvuče primjereno.

Neki već govore da Klinton titula "prvog gospodina" nikako ne bi pristajala, podsjećajući na njegove afere sa ženama i nimalo 'džentlmensko' ponašanje.

"U SAD-u imamo šest guverenerki i njihovi supruzi neslužbeno nose titule prvog gospodina", kazala je Lisa Grots, inače, ekspert za protokol.

Cijela stvar se čini složenijom jer se radi o Klintonovima.

Klinton (70) bio je predsjednik od 1993. do 2001., a kada ste jednom bili na čelu države titulu predsjednika imate doživotno, kazala je istoričarka Alida Blek.

"Zadržaće tu titulu. Prema protokolu, bit će predsjednica Klinton i bivši predsjednik Klinton", tvrdi ona.

Podsjeća i na slučaj s porodicom Buš, odnosno na Džordža W. Buša (43. predsjednika) i njegova oca Džordža, 41. predsjednika.

"Imali smo predsjednika Busha i bivšeg predsjednika Busha. Kada su bili zajedno tako smo ih oslovljavali", kazala je Blek.

"Da je Hilari udata za nekoga ko nije bio predsjednik, bio bi prvi gospodin. Ali Bil Klinton je bivši predsjednik i ne može biti 'prvi gospodin' jer je to niža titula od predsjedničke", objasnila je ona.

Lisa Grots, pak, smatra da će Bil Klinton iz poštovanja prema supruzi zajedno s njom pronaći rješenje.

Napominje se i da je Klinton vrlo aktivan i mjesecima je angažovan u kampanji svoje supruge, ali je jasno da on ne može da radi niti da prima platu ako se vrati u Bijelu kuću.

"To je protivzakonito", kazala je Blek.

Ipak, navodi se, predsjednica Klinton bi mu mogla poveriti neku neslužbenu, neplaćenu misiju, kao što je Bil to učinio za Hilari toekom njegovog prvog mandata. Klintonova je, naime, tada radila na reformi zdravstvenog osiguranja koja se pokazala neuspješnom.

Američke prve dame imaju svoje osoblje u Bijeloj kući i šefa kabineta i po ustaljenom običaju bave se stvarima do kojih im je stalo, ali ne izazivaju polemike.

Laura Buš je bila posvećena pitanju obrazovanja, dok se Mišel Obama fokusirala na vrtlarenje, borbu protiv gojaznosti i zaštitu veterana.

A politični Bil Klinton kao povrtlar? Teško zamislivo, prenijela je Hina.

( Tanjug )