Rožajci osuđeni na 4,3 godine
Rožajci osuđeni jer su 27. jula 2015. godine izazvali opštu tuču u kojoj su korištene metalne šipke, palice, nož...
Sudija Osnovnog suda Milosav Zekić osudio je juče na četiri godine i tri mjeseca zatvora devetoricu Rožajaca koji su učestvovali u tuči koja je prethodila smrtonosnom ranjavanju Anesa Kalača 27. jula prošle godine.
Prvostepenom presudom za krivična djela nasilničko ponašanje i nanošenje težih tjelesnih povreda Šaban Tarhaniš (23) i Almin Kalač (23) osuđeni su na po 11 mjeseci, a Elvis Jahović (22) na pet mjeseci zatvora.
Za nasilničko ponašanje i nanošenje lakših tjelesnih povreda Muamer Tarhaniš (26) i Mirsad Muratović (34) dobili su po šest mjeseci, a Armin Kajević (26), Armin Dacić (26), Sevad Muratović (31) i Jasmin Muratović (32) po tri mjeseca zatvora.
Rožajci su osuđeni jer su 27. jula 2015. godine u Rožajama izazvali opštu tuču u kojoj su korištene metalne šipke, drvene palice, gajbe i kolac, kao i kuhinjski nož.
Jasmin, Mirsad i Sevad Muratović, ispred čije radnje se dogodio incident, na sudu su tvrdili da su ih napali Šaban Tarhaniš, Almin Kalač, Elvis Jahović, Muamer Tarhaniš, Armin Kajević i Armin Dacić.
Njima je navodno zasmetao kamion sa kojeg su Muratovići istovarali robu, a kojim je bila blokirana saobraćajnica.
Dvije grupe su tokom dana nastavile da provociraju jedni druge, a Muratovići su oko ponoći napravili sačekušu tokom koje je ranjen Anes Kalač koji nije učestvovao u prethodnim incidentima. Kalač je od posljedica ranjavanja preminuo tri dana kasnije.
U bjelopoljskom Višem sudu u toku je postupak za to krivično djelo.
( Aida Skorupan )