Šabović: Mustafiću preči DPS od Bošnjaka
"Kad su Ranko i SDP branili Bošnjake, a branili su ih devedesetih kad je bilo najteže, Suljo tada nije ni bio Bošnjak. Postao je Bošnjak tek kad je ušao u partiju i tek kada je u tome vidio put do vlasti”, kazao je Šabović
Član predsjedništva Socijaldemokratske partije (SDP) Džavid Šabović optužio je potpredsjednika Skupštine Crne Gore Sulja Mustafića da štiti interese DPS-a, umjesto da brine o svojim sunarodnicima koji nijesu zadovoljni politikom Vlade. Mustafić je ranije kazao da predsjednik SDP-a Ranko Krivokapić svoju političku poziciju duguje DPS-u i Milu Đukanoviću, reagujući tako na Krivokapićevu primjedbu da su manjinske stranke sateliti DPS-a.
Šabović tvrdi da je Mustafić pristao da bude alatka u tuđim rukama.
"Umjesto da se zapita zašto nam sunarodnici Bošnjaci zaključavaju kuće i napuštaju zemlju, Mustafić brani DPS. Kad su Ranko i SDP branili Bošnjake, a branili su ih devedesetih kad je bilo najteže, Suljo tada nije ni bio Bošnjak. Postao je Bošnjak tek kad je ušao u partiju i tek kada je u tome vidio put do vlasti”, kazao je Šabović.
Funkcioner Socijaldemokrata Mićo Orlandić smatra da je šef parlamenta uvrijedio manjinske narode, ističući da se Krivokapić već dvije godine ponaša kao “politički satelit koji se vrti oko ose Miodraga Lekića”.
"Manjinske partije nisu sateliti"
Poslanik DPS-a Mevludin Nuhodžić kazao je da manjinske stranke nijesu sateliti DPS-a niti im se može uskratiti pravo da politički odlučuju u skladu sa svojim programima. On smatra da je Krivokapić unizio parlament kojim predsjedava.
"Tako teške optužbe na račun dojučerašnjih koalicionih partnera, i sadašnjih na lokalnom nivou, može izgovoriti samo političar kome je isključivo stalo da sačuva svoju funkciju".
( Samir Kajošević )