Bajern i Herta u polufinalu Kupa Njemačke
Bavarci su slavili u gostima sa 3:0 protiv drugoligaša Bohuma, baš kao i Herta protiv Hajdenhajma (3:2)
Bajern i Herta pridružili su se Borusiji Dortmund i Verderu u polufinalu Kupa Njemačke.
Bavarci su slavili u gostima sa 3:0 protiv drugoligaša Bohuma. Iako su domaći u prvih pola sata bili bolji tim, ekipa Pepa Gvardiole je rutinski odradila posao nakon što je preko Levandovskog načela protivnika u 39. minutu.
Posao gostima olakšao je štoper domaćih Šimunek, skrivivši penal uz direktan crveni karton u 43. minutu.
Iako je Tomas Miler promašio sa 11 metara (odbrana Manuela Rajmana), bilo je samo pitanje koliko će se puta u nastavku tresti domaća mreža.
Tijago Alkantara je u 61. minutu, na asistenciju Milera, postigao prvi gol ove sezone, a tačku je u nadoknadi stavio Levandovski.
Herta je prethodno slavila kod drugoligaša Hajdenhajma sa 3:2.
( Danilo Mitrović )