Hidink u Londonu, uskoro ozvaničenje dogovora sa Čelsijem

Nedugo nakon što je objavljen razlaz Čelsija i Žozea Murinja, ostrvske kladioničarske kuće objavile su kvote za njegovog nasljednika.

Favorit je (bio) Gus Hidink – na jednu uplaćenu funtu, mogući dobitak je 1,3.

Oni koji su uplatili tiket računajući da će se 69-togodišnji Holanđanin vratiti na klupu „plavaca“ mogu već da pokupe novac.

Sportska redakcija BBC-ija objavila je informaciju da je u jednom londonskom hotelu u toku razgovor Hidinka sa čelnicima Čelsija.

Ugovor još nije potpisan, ali to je stvar tehničke prirode, koja će biti prepuštena advokatima.

„Hidink će biti novi menadžer na privremenoj osnovi“ – zaključuje BBC.

Ako se vijest ispostavi tačnom, biće to njegov povratak na Stemford bridž poslije šest i po godina.

Bivši selektor Holandije je vodio Čelsi od februara do juna 2009. godine, takođe sa statusom „v.d.“, kao nasljednik Brazilca Skolarija.

( BBC, B. K. )