Ražnatović: Zbog problema iseljavanja zanemariti sve međupartijske borbe
Migracije su, dodao je, državni problem na koji je Pozitivna odavno ukazivala u parlamentu pozivajući državne organe da se blagovremeno posvete rješavanju ovog problema
Pozitivna Crna Gora zatražila je hitnu reakciju svih nadležnih organa, prvenstveno Vlade, kako bi problem iseljavanja sa sjevera bio riješen.
Migracija, kako je ocijenio politički direktor Pozitivne, Aleksandar Ražnatović, može imati dalekosežne posljedice po državu i društvo.
Ražnatović je rekao da je Pozitivna, kao doprinos zaustavljanja migracija sa sjevera, pripremila zakonska rješenja koja će predati u skupštinsku proceduru.
Migracije su, dodao je, državni problem na koji je Pozitivna odavno ukazivala u parlamentu pozivajući državne organe da se blagovremeno posvete rješavanju ovog problema.
"Podsjećamo na to da je POSP prihvatio predlog Pozitivne kojim se poziva na definisanje i usklađivanje ekonomske politike kako bi se, između ostalog, smanjile regionalne razlike i iseljavanje stanovništva sa sjevera na jug i van zemlje", naveo je Ražnatović.
Prema njegovim riječima, problem je toliko narastao da je nužno zanemariti sve međupartijske borbe na relaciji Vlada i lokalne uprave u kojima nije na vlasti Demokratska partija socijalista.
"Iseljavanja ne smiju biti predmet borbe unutarstranačkih prepucavanja nauštrb građana, kojima je pomoć prijeko potrebna. Iseljavanje stanovništva sa sjevera se mora zaustaviti, a to je jedino moguće kroz ekonomsku politiku istinskog ravnomjernog regionalnog razvoja, za šta je, prije svega, odgovorna Vlada Crne Gore", kazao je Ražnatović.
Kako je rekao, hitno se moraju preduzeti mjere po kojima bi se značajno povećalo zapošljavanje u sjevernom dijelu države, uredila poreska politika oslobađanjem poreza za period od pet godina, uvođenje povraćaja do 50 odsto u sve investicije, a sve radi otvaranja malih i srednja preduzeća i zapošljavanja radnika sjeverne regije.
( MINA )