Vježbe protiv menstrualnih bolova

Bolove tokom menstruacije ima mnogo žena. Pritisak u donjem dijelu stomaka, bolovi u leđima, grudima i grčevi su najčešći simptomi, a nerijetko se javljaju i tegobe, poput glavobolje i malaksalosti.

U akutnim stanjima mogu da pomognu odgovarajući analgetici, a kada slobodno vrijeme to dozvoljava, od pomoći su i određene vježbe. One regulišu prokrvljenost karlice i opuštaju mišiće. Osim toga, tokom menstruacije poželjnije je što više kretanja, jer se tako mnogo bolje prevazilazi neprijatno stanje nego ležanjem i mirovanjem.

Četvoronožni položaj

Oslonite se na šake i koljena. Glavu spustite, a leđa izvijte poput mačke. Pri tome, mirno udišite i izdišite i zadržite ovaj položaj oko dva minuta.

Istezanje leđa

Sjedite i ispružite noge. Savijte desnu nogu, a stopalo stavite na unutrašnju stranu lijeve butine. Udahnite i podignite ruke iznad glave. Izdahnite i savijte se prema naprijed iznad lijeve noge. Zadržite položaj pola minuta, zatim udahnite i vratite se u početni položaj. Ponovite isto savijanjem lijeve noge.

Ljuljanje

Lezite na pod na leđa. Noge savijte, privucite na grudi i obgrlite ih rukama. Nekoliko puta se lagano zaljuljajte nalijevo i nadesno. Na ovaj način se blago masira područje oko kičme.

Spojena stopala

Sjedite na ravnu podlogu. Ispod glave i ramena podmetnite veći jastuk. Savijte noge tako da su stopala spojena. Polako dišite i odmarajte se nekoliko minuta.

Noge u vazduhu

Lezite na leđa i podignite noge. Pod donji dio leđa podmetnite jastuče. Ruke i ramena su opuštena. Podignite noge, raširite i držite u vazduhu. Dišite mirno i ostanite u ovom položaju nekoliko minuta.

( Vijesti online )