Zagreb: Razbijena zločinačka grupa za međunarodnu prostituciju

Zagrebačka policija razbila je međunarodnu zločinačku grupu, koja je od jula 2013. godine angažovala više djevojaka iz Hrvatske, Srbije i Bosne i Hercegovine radi pružanja ilegalnih seksualnih usluga u hotelima u Njemačkoj.

Policija je kriminalističkim istraživanjem obuhvatila deset osoba, od kojih pet, u dobi od 25 do 51 godine, tereti za zločinačko udruženje, a preostalih pet, u dobi od 30 do 40 godina, zbog prostitucije.

Zločinačko udruženje je, uz još četiri hrvatska državljanina, organizovao i vodio njemački državljanin s privremenom adresom u Hrvatskoj u čijoj su organizaciji prostitutke pružile najmanje 2.000 seksualnih usluga po ukupnoj cijeni od 650.000 kuna (oko 84.000 eura), prenosi Radio Slobodna Evropa.

U razbijanju lanca prostitucije, zagrebačka policija je u koordinaciji USKOK-a, sarađivala sa njemačkom policijom, policijskim časnikom za vezu u njemačkoj ambasadi u Zagrebu te bosanskohercegovačkom Državnom agencijom za istrage i zaštitu (SIPA).

Svi osumnjičeni su završili u pritvoru, a kazneno su prijavljeni USKOK-u i zagrebačkom Opštinskom državnom tužilaštvu.

Policija je utvrdila da se sa pet osumnjičenih osoba, među kojima je organizator grupe, udružilo i više nepoznatih muškaraca i žena.

( Vijesti online )