Zvezda srušila Budućnost Voli u posljednjoj četvrtini
Crnogorski šampion je odlično igrao 30 minuta, u dva navrata je imao i 12 poena viška
Budućnost Voli je igrala sjajno 30 minuta u duelu sa Crvenom zvezdom u “Pioniru”, ali to nije bilo dovoljno da se izbjegne prvi poraz u sezoni.
Pad koncentracije na startu posljednje dionice, kada je izgubljeno nekoliko lopti koštalo ih je poraza.
Kod rezultata 54:59, Crvena zvezda je napravila seriju 15:0 za 69:59 i povratka za crnogorskog šampiona nije bilo.
U toj seriji Majk Cirbes je ubacio šest poena, a pratili su ga Nemanja Dangubić i Nikola Kalinić sa uspješnim šutevima iz linije 6,75 metara.
Konačan rezultat ne odslikava pravo stanje na terenu, jer su se “plavi” prikazali u odličnom izdanju.
Nakon uvodnih minuta koji su protekli u igri koš za koš, Budućnost Voli je u 7. minutu košem Suad Šehovića povela (11:9) i prednost nije ispuštala do 33. minuta, ali je mala korist od toga, bodovi su ostali u Beogradu.
Igrali su izabranici Igor a Jovovića posebno dobro u drugoj četvrtini, kada se razigrao Džej Ar Rejnolds, koji je pogodio tri vezane trojke, jednu uz faul, pa je prednost u dva navrata iznosila i 12 razlike (38:26, 40:28).
U samoj završnici prvog dijela Markus Vilijams je ubacio pet poena, pa se na veliki odmor otišlo sa rezuzltatom 34:40.
I u nastavku gosti su kontrolisali dešavanja na terenu, na kraju treće četvrtine izgledalo je da su na korak od senzacije.
Nekoliko lakih poena, nažalost, dalo je krila srpskom vicešampionu, koji se razigrao i lako meč priveo kraju.
Rejnolds je bio najbolji u redovima Podgoričana sa 18 poena (13 u prvom poluvremenu, četiri trojke), a pratili su ga Šehović (15, devet skokova) i Darko Planinić (10, osam uhvaćenih lopti).
U redovima Crvene zvezde sa 18 koševa (10 u prvom dijelu) najbolji je bio Jaka Blažič.
Dvocifreni su još bili Boban Marjanović (12, 17 skokova), Vilijams (11, sedam asistencija) i Dangubić (11, pet skokova, četiri asistencije).
C. Zvezda - Budućnost Voli 83:69 (14:17, 20:23, 20:19, 29:10)
Beograd - Dvorana: “Pionir”. Gledalaca: 4.000. Sudije: Radović, Dožai (Hrvatska), Petek (Slovenija).
Crvena zvezda: Vilijams 11 (1-1), Rebić, Dangubić 11 (6-4), Mitrović 6, Lazić 6, Blažić 18 (6-6), Kalinić 5, Marjanović 12 (6-4), Tejić, Dženkins 3 (4-1), Jović 3 (1-1), Cirbes 8 (3-2).
Budućnost Voli: Kuk 5, Šehović 15 (4-4), Dašić 9, Planinić 10 (2-0), Subotić 6 (2-1), Čarapić, Šihi 2, Vitkovac, Popović, Rejnolds 18 (3-2), Ćapin 2, Rikić 2.
( Danko Misita )