Barski ribolovci "upecali" vepra kod Valdanosa

Dvojica Barana koji su proteklog vikenda u Valdanosu kod Ulcinja došli u ribolov, kući su se vratili sa ulovljenim veprom od 60 kilograma. “Vijestima” je nekoliko ulcinjskih ribara, očevidaca nesvakidašnjeg događaja, ispričalo kako su Barani Momo Ražnatović i Ranko Petranović umjesto krnju, po koju su vjerovat no došli, jer je podmorje Valdanosa sa brojnim usjecima i pećinama poznato stanište te ekstra kvalitetne ribe, usred mora u uvali, ulovili divlju svinju. Ništa tog jutra nije „mirisalo" na nešto neobično, a kamoli nevjerovatno i gotovo spektakularno. Jedan od Barana bio je u barci, drugi pod vodom sa puškom u lovu na krnju. Ni prisustvo nekoliko mještana koji su ribarili po mirnoj uvali, nije remetilo tišinu sunčanog jutra. Onda je sa visokih stijena Viline grede u more prvo skočio vepar a za njim i jedan od kerova koji su ga jurili. "Vepar nije imao drugog izlaza sem skoka sa visoke litice. Mislim da sam u djeliću sekunde, kada mi je pažnju skrenuo neobičan prizor, primijetio da se čak nije ni zaustavio baš kao ni ker" ispričao je “Vijestima” jedan od očevidaca.

Pas je valjda iznenađen novostalim okolnostima stao, dok je vepar nastavio bjekstvo, ali na njegovu nesreću, pravo prema barci Barana. Kada je bio blizu, Baranin koji je bio u barci, udario gaje nekoiliko puta sidrom po glavi. Posao je okončao njegov kolega iz vode hicem iz podvodne puške.

"Samo su bili u pravo vrijeme i na pravom mjestu. Veprovi se love po šumama i poljanama u sačekušama ali vam ne dolaze sami i to još plivajući. Ali eto, umjesto krnje ili hobotnice, stigao je vepar", prokomentarisao je jedan od ulcinjskih ribara koji je posmatrao cijeli događaj.

( Samir Adrović )