Osuđeni otac i dva sina: Adrovićima 13 godina zatvora
Obdukcioni nalaz pokazao je da je smrt Selimovića nastupila usljed zadobijenih povreda po glavi i tijelu
Izet Adrović iz beranskog naselja Donji Talum osuđen je na četiri godine zatvora, a njegovi sinovi Feho i Kenan kažnjeni su po šest mjeseci više, zbog nanošenja teških tjelesnih povreda Berancu Mirašu Selimoviću (51) u oktobru 2012. godine.
Selimović je od tada zadobijenih povreda preminuo.
Trojici Adrovića presudu je juče, u bjelopoljskom Višem sudu, izrekao sudija Vidomir Bošković.
Izet, Feho i Kenan su, prema navodima optužnice, 27. oktobra 2012. godine jedan sat iza ponoći u beranskom naselju Gornji Talum kao suizvršioci ubili Selimovića.
Adrovići su tada Selimovića uhvatili u krađi, nakon što je on provalio u njihov pomoćni objekat. Sustigli su ga dok je pokušavao da se udalji i pretukli.
U optužnici piše da su ga udarali nogama i rukama po glavi i tijelu, i nanijeli mu teške tjelesne povrede, opasne po život.
Od posljedica prebijanja preminuo je sat kasnije u beranskoj bolnici.
Obdukcioni nalaz pokazao je da je smrt nastupila usljed zadobijenih povreda po glavi i tijelu.
( Jadranka Ćetković )