Automobili kojima najmanje pada cijena

Svaki novi automobil od prvog dana gubi na vrijednosti. Ali tokom vremena cijena ne pada svim vozilima istim tempom.

Pošto je ovaj podatak vrlo važan za kupce novih vozila, njemački magazin Autobild je i ove godine na osnovu temeljne analize napravio listu modela kojima vrijednost opada najmanje. Ispitivanje je rađeno na vozilima starim četiri godine koji su prešli tipičnu kilometražu za tu starost, a podijeljena su na 11 kategorija, od najmanjih gradskih do sportskih vozila.

Osim modela kojima je vrijednost izražena u eurima najmanje pala za ovaj period, napravljena je i paralelna lista gdje su izdvojeni automobili koji su najmanje izgubili na vrijednosti u procentima.

Naravno, najmanji efektivni pad vrijednosti u nižim klasama imaju najjeftiniji automobili, pa su tako Dačijini modeli u vrhu u tri kategorije.

Koliko inače cijene vozila padaju na njemačkom tržištu prikazaćemo na primjeru dačije logan MCV 1.2, čija je cijena u salonu 10.810 eura, a nakon četiri godine cijena padne za 4.910 eura. Na drugom mjestu je kia ceed 1.4, čija cijena padne za 7.439 eura, sa 14.590 na 7.151 euro. Treću poziciju drži tojota auris 1.33, koja kao nova košta 16.825 eura, a cijena joj padne za 8.325 eura.

U srednjoj klasi najmanje gubitke bilježi Škoda oktavija 1.2 TSI (nova košta 18.200, gubitak 9.249 eura). U priloženoj tabeli ćete naći pobjednike po kategorijama.

( Saša Marković )