Bernardić: Vrijeme je da se školski brod "Jadran" vrati u Hrvatsku
„Jadran“ je 16. jula 1933. uplovio u Tivat kao svoju prvu luku u Jugoslaviji nakon što je stigao iz Njemačke, gdje je izgrađen u brodogradilištu „Stulcken“ u Hamburgu
Nekadašnji komandant školskog broda „Jadran“, bivši visoki oficir Jugoslovenske ratne mornarice (JRM) i jedan od utemeljivača Hrvatske ratne mornarice Stjepan Bernardić izjavio je da je „vrijeme da se „Jadran“ vrati u Hrvatsku, koja je, po njegovom mišljenju, pravi dom slavnog jedrenjaka.
„Premda u Crnoj Gori 'Jadran' služi u rezidencijalne svrhe, brod je danas zapušten jer Crna Gora nema kapaciteta za njegovo održavanje. Dosadašnji remonti obavljeni su improvizirano i površno.
Vrijeme je da se školski brod 'Jadran' vrati doma, gdje bi mu bila pružena prava briga i gdje bi se na svome starom vezu u luci Lora, osjećao bolje”, napisao je Bernardić u tekstu u splitskom magazinu „Otvoreno more“.
Bernadić, koji je bio vođa stručnog tima Hrvatske za sukcesiju materijalnih sredstava bivše JRM u pregovorima o sukcesiji država nastalih raspadom nekadašnje SFRJ, zastupnik je teze po kojoj Crna Gora treba Hrvatskoj da plati više od 1,8 milijardi dolara na ime nadoknade za ratne brodove i materijalna sredstva JRM koji su se, nakon osamostaljenja Hrvatske, 1992. godine povukla iz Hrvatske i došla u Boku Kotorsku.
„U agresiji na Hrvatsku koju su počinile JNA i JRM, Crna Gora je prisvojila više od 84 odsto te flote i smatra je svojim vlasništvom, uprkos Sporazumu o pitanjima sukcesije, potpisanom u Beču 2001. godine.
Ovim sporazumom nedvojbeno se dokazuje da je školski brod 'Jadran' od 1972. upisan u Flotnu listu JRM u ratnoj luci Lora u Splitu, te se u trenutku raspada SFRJ pravno nalazio u Hrvatskoj.
Matična luka 'Jadrana' uvijek se nalazila uz mornaričke vojne škole u Hrvatskoj: do Drugog svjetskog rata od Dubrovnika, Šibenika i Pule, a nakon njega od Dubrovnika, Divulja pokraj Splita do ratne luke Lora u Splitu. Danas se nalazi u Crnoj Gori, koja nema nikakvih vojnih škola“, piše Bernardić.
Pritom bivši visoki oficir JRM zaboravlja činjenicu da „Jadran“ prije Drugog svjetskog rata nikako nije mogao bazirati u Puli jer je taj grad bio u sastavu Italije, a ne Kraljevine Jugoslavije, kao i činjenicu da je novoizgrađeni „Jadran“ 16. jula 1933. godine uplovio u Tivat kao svoju prvu luku u Jugoslaviji nakon što je stigao iz Njemačke, gdje je izgrađen u brodogradilištu „Stulcken“ u Hamburgu.
Brod je za sve vrijeme redovno održavan u bivšem vojnom brodogradilištu Arsenal u Tivtu. “Jadran” se izbijanjem rata u bivšoj SFRJ, 1991. godine, opet zatekao u Tivtu, ovog puta na tzv. malom remontu i od tada se do danas neprekidno nalazi u Boki.
Galerija
( Siniša Luković )