Pošta u Bijelom Polju slavi AVNOJ
Prije više od dvadeset godina pokretane su inicijative da se grb ukloni sa zgrade Pošte, ali je opstao
Iako su simboli bivše Jugoslavije odavno prešli u zaborav grb FNRJ na zgradi bjelopoljske Pošte u centru grada još uvijek prkosi vremenu. Građani su se navikli na grb a stariji se sa dubokim poštovanjem odnose prema tom znamenju. Direktor Pošte Bijelo Polje Muhedin Spahić kaže da je grb postavljen vjerovatno 1954. godine, kada je dograđen sprat.
Nema zvaničnih podataka ko je zaslužan za postavljanje grba na Pošti
“Prema tom simbolu uvijek smo se odnosili sa dužnim poštovanjem te je prije dvije godine, prilikom izrade fasade na Pošti uz saglasnost rukovodstva, moler Fadil Beganović osvježio i grb”, kazao je Spahić.
Iz opštinskog Udruženja SUBNOR-a ističu,da su prije više od dvadeset godina, kada se raspala SFRJ, pokretane inicijative da se grb ukloni sa zgrade Pošte, “ali da je na sreću svih generacija opstao“.
Nema zvaničnih podataka ko je zaslužan za postavljanje grba na Pošti, ali, prema kazivanju nekih starijih gradjana, odluku o postavljanju znamenja donijelo je tadašnje lokalno rukovodstvo.
Rad umjetnika
Još u toku narodnooslobodilačke borbe krajem novembra 1943. godine, u vrijeme Drugog zasjedanja AVNOJ-a, kada su postavljeni temelji novog jugoslovenskog društva, nastao je grb socijalističke Jugoslavije, zajedničkim radom umjetnika Đorđa Andrejevića Kuna i Antuna Augustinčića prilikom ukrašavanja sale Doma kulture u Jajcu.
Interesantno je da se na novom državnom grbu, proglašenom 1946. godine, nalazio plamen od pet buktinja
Po odluci Predsjedništva AVNOJ-a, Augustinčić je nešto ranije izradio budući grb u duborezu s buktinjama kao osnovnim elementima. Buktinje su predstavljale narode Jugoslavije, a po ranijoj odluci unijet je u grb i datum zasjedanja 29. novembar 1943. godine.
Kun je načinio nacrt žita, koji je potom dopunjen sa pet baklji. Datum 29. novembar 1943. godine dodat je na grb nakon zasjedanja AVNOJ-a, a grb je, u nešto izmijenjenom obliku, zvanično usvojen tek Ustavom FNRJ 1946.
Interesantno je da se na novom državnom grbu, proglašenom 1946. godine, nalazio plamen od pet buktinja - simbolom bratstva i jedinstva pet nevedenih konstitutivnih naroda. Šesta buktinja, koja je predstavljala Muslimane, danas Bošnjake, ili pak šest jugoslovenskih republika, pridružena je plamenu dvije decenije kasnije.
( Beća Čoković )