Harison Šmit: Mjesec je izvanredan za proučavanje

Obilježavajući 40 godina od posljednje misije na Mjesec, astronaut Harison Šmit izjavio je 7. decembra da su sadašnje vlade nedovoljno efikasne u istraživanju našeg satelita koji još uvijek krije mnoge tajne.

Smit negira teoriju da je Mjesec nastao odvajanjem od Zemlje prilikom udara nekog velikog asteroida

Šmit, inače jedna od posljednjih osoba čiji su tragovi utisnuti na površinu Mjeseca, nije zadovoljan razvojem istraživanja tog nebeskog tijela i smatra da će sve pasti na inicijative privatnih kompanija.

U razgovoru za BBC, Šmit je kazao da su američki, ali i zvaničnici drugih zemalja, nedovoljno zainteresovani za otkrivanje Mjesečevih tajni. Prema njegovim riječima, buduća otkrića vjerovatno će biti zasluga privatnih kompanija koje su između ostalog zainteresovane za komercijalne posjete Mjesecu.

Smit je dodao da je Mjesec još uvijek neistražen, te da su ranije misije samo zagrebale površinu ovog tajanstvenog tijela.

Gravitacija Zemlje

On takođe negira teoriju da je Mjesec nastao odvajanjem od Zemlje prilikom udara nekog velikog asteroida. Njemu je vjerovatnija teorija da je Mjesec samo još jedno nebesko tijelo koje je Zemlja privukla svojom gravitacijom.

Posljednja misija koja je posjetila Mjesec, u čijem je sastavu bio i Šmit, sletjela je na satelit 7. decembra 1972. godine

“Mislim da asteroid predstavlja samo diverziju”, kazao je Šmit za “Discovery News”. Astronaut je kritikovao i politiku SAD koja je prednost dala Marsu zbog navodno jeftinijih troškova istraživanja.

“Zašto je krajnji cilj da se stigne do Marsa, ako na samo tri dana putovanja imate satelit koji je izvanredan za proučavanje i mogao bi da da odlične rezultate”, pita se Šmit.

Posljednja misija koja je posjetila Mjesec, u čijem je sastavu bio i Šmit, sletjela je na satelit 7. decembra 1972. godine, a mnogi i dan - danas ne vjeruju da je ljudska noga kročila na Mjesec.

( Vijesti online )