Irak zabranio slijetanje aviona turskog ministra
Irak je danas zabranio slijetanje aviona turskog ministra za energetiku Tanera Jildiza u Erbil, glavni grad iračkog regiona Kurdistan, rekli su danas irački i kurdski zvaničnici
"Let nije imao neophodne dozvole i zato je odlučeno da bude zabranjeno slijetanje na aerodrom u Erbilu", rekao je agenciji Frans pres šef iračke službe za civilno vazduhoplovstvo Naser Bandar, a te informacije potvrdio je i neimenovani kurdski zvaničnik.
Jedan turski zvaničnik rekao je agenciji Frans pres da je avion ministra zato preusmjeren ka centralnom dijelu Turske.
Turski ministar je išao na međunarodnu konferenciju o gasu i nafti koja se održava u Erbilu. On je za tursku privatnu televiziju NTV rekao da je u pitanju "greška".
Kako je javila agencija Anadolija, iračka vlada je opravdala tu odluku "tehničkim razlozima".
Današnji incident se dogodio u trenutku tenzija u odnosima Bagdada i Ankare zbog odbijanja Turske da izruči jednog od glavnih sunitskih vođa u Iraku Tarika al-Hašemija koji je u odsustvu osuđen na smrtnu kaznu zbog ubistva jednog generala i jednog advokata.
Bagdad je u avgustu uputio zvaničan protest zbog posjete šefa turske diplomatije Ahmeta Davutoglua Kirkuku zato što prethodno nije obavijestio centralne vlasti.
( Beta )