Furiozni Inter i Napoli, remi Rome
Inter je bio siguran na gostovanju Peskari (slavio sa 3:0), dok se Milan okliznuo protiv Sampdorije pred svojim navijačima.
Inter i Napoli su u velikom stilu prošli kroz Peskaru i Palermo, Roma je mogla samo do 2:2 protiv Katanije, dok je Milan porazom od Sampdorije pokazao da ga čeka težak život ove sezone bez svih zvijezda koje je izgubio u prelaznom roku.
Najbolji utisak je svakako ostavio Inter, tim koji je promijenio pola sastava, ali koji je protiv Peskare bio silovit.
Vesli Snajder je nakon asistencije Dijega Milita donio prednost u 17, u 19. je Argentinac pogodio poslije dodavanja Antonija Kasana, a nastavku se upisao i Filip Kutinjo, koji je zamijenio doskorašnjeg napadača Milana.
"Ovo je prvi korak, ali mogu da budem zadovoljan. Kada smo imali loptu u posjedu smo uvijek bili opasni, to je ono što sam želio. Kasano? Uvjerio me na prvom treningu da može da bude starter, zato je i igrao", rekao je trener milanskog kluba Andrea Stramaćoni.
Milan se nije proslavio na početku sezone - tri boda sa "San Sira" odnijela je Sampdorija (1:0), a zvižduci navijača na kraju utakmice govore šta misle o trenutnom stanju u klubu.
"Nadam se da ćemo reagovati do kraja prelaznog roka", bio je jasan trener Milana Masimilijano Alegri.
Vicešampion Italije je, doduše, u finišu stvorio makar četiri šanse da izbjegne poraz, ali su šutevi Boatenga, Flaminija, Jepesa i Konstanta završili ili na stativi ili u naručju golmana Serhija Romera.
S druge strane, Samp nije mogao da poželi bolji povratak u elitu, a junak tima Ćira Ferare bio je lijevi bek Andrea Kosta koji je pogodio u 59. minutu nakon asistencije Tisonea.
Od Rome se očekivalo mnogo na startu, ali je na kraju jedva izvukla i bod protiv Katanije (2:2).
Katanija je dva puta vodila (kod oba gola Sicilijanaca Rimljani su atražili ofsajd poziciju), a "vučica" se dva puta vraćala u život preko Osvalda koji je pogodio maestralnim makazicama i mladog Nikolasa Lopesa.
"I rezultat i igra su mogli da budu bolji, radićemo na tome u narednom periodu. Možda smo i mali pali pred pritiskom, a prvi gol Katanije je bio čist ofsajd", kazao je trener Rome Zdenjek Zeman.
Napoli makar na startu nije pokazao da ga je previše poremetio odlazak Ezekjela Lavecija i Valtera Gargana, pa je počišćen Palermo na „Barberi” (3:0), a strijelci su bili Marek Hamšik, Kristijan Mađo i Edinson Kavani.
Rezultati
Milan - Sampdorija 0:1 (Kosta 59)
Atalanta - Lacio 0:1 (Ernanes 17)
Kjevo - Bolonja 2:0 (Pelisije 65, Krusado 78)
Đenova - Kaljari 2:0 (Merkel 51, Imobile 85)
Palermo - Napoli 0:3 (Hamšik 45+3, Mađo 79, Kavani 88)
Peskara - Inter 0:3 (Snajder 17, Milito 19, Kutinjo 81)
Roma - Katanija 2:2 (Osvaldo 59, Lopes 90+1 - Markeze 29, Gomes 68)
Sijena - Torino 0:0.
Subota
Fiorentina - Udineze 2:1
Juventus - Parma 2:0.
Galerija
( A. H. )