Princip jedinstva

Prije par mjeseci objavljeno je otkrivanje nove planete van Sunčevog sistema za koju postoje nagađanja da bi u daljoj budućnosti mogla poslužiti kao alternativno rješenje za problem prenaseljenosti Zemlje ili pretjerane eksploatacije njenih resursa.

Čovječanstvo je svjesno da su od nastanka civilizacije do danas tok istorije obilježila neoprostiva rasipanja svim što je priroda podarila ljudskoj vrsti koja je, umjesto da to savjesno čuva, uništavala sve što je mogla. Hiljade godina su umjesto na progres i borbu za bolji život cijele populacije utrošeni na vjerske, rasne i druge političke sukobe.

Društvene nauke kao jednu od polaznih osnova uzimale bi sklonost pojedinca ili grupe da se drugačije odnosi prema pripadnicima one grupe od koje se prema određenom kriterijumu razlikuje. Za to vrijeme prirodni procesi koji funkcionišu na principu neuništivosti materije koja kruži i energije koja protiče činili su da se Zemljini potencijali pretvore u prenaseljenu planetu punu netrpeljivosti zbog nedostatka energenata i radnih mjesta.

Ovi problemi važe za cijelu ljudsku vrstu, koja i dalje troši ogromnu energiju i sredstva na međusobne sukobe. Ostvare li se jednom predviđanja naučnika da bi se nedostatak resursa mogao potražiti u nekim novim svjetovima, moglo bi se, hipotetički, dogoditi da i ovakav pohod u nepoznato rezultira susretom sa novom, doslovno, vanzemaljskom vrstom.

Ogriješila bih se o njih ako bih rekla da je i vanzemaljska karakteristika ono što je Džon Lok napisao o ljudskoj vrsti – prirodno stanje rata, ali ne isključujem mogućnost izostanka jednakog viđenja situacije. Bez obzira na okolnosti u kojima bi se to odvijalo, ljudska vrsta bi prvi put od svog nastanka bila ujedinjena. Po prvi put bismo svi bili samo Zemljani i imali jedinstven cilj da sačuvamo planetu.

Nedavno je premijer Crne Gore boravio u Banjaluci na zajedničkom sastanku čelnika država regiona, a povod su bili problemi nastali usljed vremenskih nepogoda koje su u zemljama regiona uzrokovale uvođenje vanrednog stanja.

Nesvakidašnje vremenske neprilike pogodile su sve balkanske zemlje, a kao posljedicu imale su ljudske žrtve i materijalnu štetu. Razgovaralo se o pripremi plana i koordinacije aktivnosti na zajedničkom sprečavanju posljedica koje ovakvi događaji izazivaju, usvojeni su zaključci prema kojima se daje puna podrška nadležnim institucijama svih država čiji su predstavnici bili na sastanku kako bi se omogućilo nesmetano izvođenje koordiniranih aktivnosti.

Nakon godina ratovanja i dvodecenijske predratne i poslijeratne netrpeljivosti, prvi put se u bivšim jugoslovenskim zemljama nije isticala bilo kakva različitost. Prirodne sile učinile su sve narode i narodnosti jednakim pred neuobičajenim količinama sniježnih padavina i rekordno niskim temperaturama, a samo ujedinjeni u borbi protiv zajedničkog problema čija prijetnja nije fikcija ljudskog uma ovaj dio svijeta mogla je dovesti do kompromisa.

Budemo li redom veličina premiještali fokus sa kosmičkog na zemaljski, te na regionalni plan, doći će se i do primjene ove utvrđene zakonitosti i na manjem sistemu kakav je jedno društvo ili država. Više od dvije decenije ovu zemlju obilježavaju podjele. Nema kategorije ili institucije po kojem pitanju se građani Crne Gore ne mogu svrstati na najmanje dvije strane. Podjele i dalje važe kao osnovno sredstvo manipulacije građanima, a priča o njima uvijek je bila najpraćenija medijska zabava.

Dovoljno je da se u medijima inicira pitanje Željezare, Telekoma ili KAP-a i da se, poput alarmnog mehanizama pokrenu priče o jezicima, crkvama i strofama himne. Protagonisti ovih, ne predstava, već cirkuskih tačaka toliko neuvjerljivo glume da bi do sada svima moglo biti jasno da su uloge velikih Crnogoraca i velikih Srba odlično plaćene i da je tu kraj svoj priči koja emocije pobuđuje kod, svakako ne malog broja izmanipulisanih ljudi koji zbog ove retorike nastavljaju da podržavaju kontinuirano propadanje ovog društva, zaboravljajući na spostveno siromaštvo i sve druge pojave koje su mu uzrok ili posljedica.

Generalno loša ekonomska situacija i preskupa struja su zajedno u ovom slučaju ona viša sila koja ujedinjuje sve koji treba da prevaziđu razlike, a razlozi zbog kojih se to ne događa nisu samo neznanje da se svi pomenuti glumački honorari finansiraju našim novcem, već i u pogrešnom vjerovanju da trenutno stanje nema alternativu, ne tražeći je, a tu nam je, pred očima. Zato, na protest!

( Ana Nives Radović )