Posljednja ispovijest kapetana koji je skočio u smrt sa ženom i sinom
18 godina godina nije mogao da dobije dijete, a nakon što je dobio sina, tri godine je sa porodicom živio u stanu od 15 kvadratnih metara
Snimak tužne ispovijesti penzionisanog kapetana Vojske Srbije, Palka Ponjigera, koji je u utorak sa suprugom i sinom skočio sa zgrade hotela u Beogradu, objavljen je na YouTube mreži.
U pitanju je Ponjigerova ispovijest iz juna, na sastanku Udruženja vojnih beskućnika, prenosi Blic.
Ponjiger je sa suprugom Ilonkom i trogodišnjim sinom Milanom, skočio sa šestog sprata hotela za vojne samce u Beogradu. Ponjiger i supruga su stradali pri padu, a dječak je preživio i oporavlja se od teške operacije.
U govoru koji je objavljen na YouTube mreži, Ponjiger priča kako je u Vojsci bio kapetan prve klase, a nakon operacije srca 2001. godine odlazi u penziju. Vlasti Srbije su mu obezbijedile smještaj u hotelu za samce 'Zvezdara' 2003. godine.
Ponjiger je radio kao nastavnik u vojnim školama u Rajlovcu, Somboru i Batajnici. Kroz suze priča kako je srpskom ministarstvu obrane podnio zahtjev za beskamatni kredit od 20.000, koji nije nikad nije dobio.
"Ja sam sa suprugom. Supruga mi je Hrvatica. Ja sam Slovak! Nigdje se nisam mogao priključiti vojsci. Nijednoj! Jer me nisu željeli. A nisam pobjegao. I nisam ratovao, nego sam došao u prekomandu", ispričao je Ponjiger.
Požalio se i što su vlasti od njega tražile da im vrati 500.000 dinara koje je dobijao za odvojeni život i uvećane troškove stanovanja:
"Kome da vratim? Kome?!"
Ponjiger je ispričao i kako 18 godina godina nije mogao da dobije dijete, a nakon što je dobio sina, tri godine je sa porodicom živio u stanu od 15 kvadratnih metara. Kako bi si olakšao situaciju otišao je da živi kod majke na selo, ali ga je, kako je rekao, majka "isakatila, jer je bolesna žena".
"Bio sam 10 dana u pritvoru, u Mitrovici, zato što je moja majka prijavila da sam ja nju maltretirao", ispričao je Ponjiger.
Galerija
( Vijesti online )