iPhone 4S i dalje kuburi s baterijom
Neki korisnici tvrde da je nakon nadogradnje autonomija njihovih „pametnjakovića“ još kraća
Izvjestan broj korisnika Appleovog pametnog telefona iPhone najnovije generacije tvrdi da posljednje osvježenje operativnog sistema iOS, koje nosi oznaku 5.0.1, nije riješilo probleme u vezi sa skraćenjem autonomije koju pruža ugrađena baterija, što je bio primarni (ali ne i jedini) cilj objavljivanja te nadogradnje.
Kako se može pročitati na Appleovom forumu, neki korisnici tvrde da je nakon nadogradnje autonomija njihovih „pametnjakovića“ još kraća.
Jedan korisnik navodi: „Nakon što sam nadogradio operativni sistem na verziju 5.0.1 moj iPhone troši bateriju još brže! Da li je još neko naišao na ovakav problem?“
Drugi korisnik je odgovorio: „Mogu da podržim ovu tvrdnju... Nakon što sam instalirao iOS 5.0.1, napunio sam bateriju u potpunosti prije nego što sam otišao na spavanje. Nakon 7 sati nivo napunjenosit baterije smanjio se za 79 odsto, a pao je za još 5 odsto dok kucam ovu poruku. Probaću večeras da vratim softver na prethodnu verziju...“
Treći korisnik je čak naveo da nije imao problema sa svojim pametnim telefonom iPhone 4S sve dok nije instalirao pomenutu nadogradnju operativnog sistema.
S druge strane, nisu se svi složili sa ovim navodima. U jednoj poruci na forumu piše: „Nakon nadogradnje autonomija moje baterije je znatno veća. Možda vi niste izvršili nadogradnju na pravi način ili imate aplikacije koje vam rade u pozadini. Lako je optuživati da nadogradnja nije dobra čak i kada se još ne zna da li je u pitanju greška korisnika.“
Apple je potvrdio da nadogradnja nije riješila sve probleme i da trenutno ispravljaju nekoliko preostalih propusta.
( Vijesti online )