Hrvatska dobila nacrt ugovora o pristupanju EU
Nacrt ugovora biće preveden na hrvatski jezik, ali i sve službene jezike Evropske unije do kraja oktobra
Premijer Poljske Donald Tusk uručio je premijerki Hrvatske Jadranki Kosor nacrt ugovora o pristupanju Republike Hrvatske Evropskoj uniji, kazavši da bi bio vrlo zadovoljan kada bi taj ugovor bio potpisan u Varšavi, koja trenutno predsjeda Evropskom unijom.
Nacrt ugovora biće preveden na hrvatski jezik, ali i sve službene jezike Evropske unije do kraja oktobra, kako bi ugovor mogao da ide na razmatranje u Evropski parlament, koji mora da da pristanak prije potpisivanja.
"Ovo je važan i istorijski trenutak radosti i sreće za sve nas. Zahvalna sam svom poljskom kolegi što je lično donio nacrt ugovora u Zagreb. Hrvatska je danas jedan ogroman korak bliže članstvu u Evropsku uniju", rekla je Kosor, prenosi HRT.
Nije poznato mjesto i vrijeme potpisivanja pristupnog ugovora.
Prema briselskom kalendaru, za sad, je to moguće 5. decembra kada se sastaju ministri vanjskih poslova zemalja članica ili 9. decembra na sastanku šefova država i vlada.
( Vijesti online )