Sergej Ćetković: Treba mi 20 minuta tišine, flaša "vranca" i malo smijeha sa bendom

Pop zvijezda Sergej Ćetković krajem ovog mjeseca i početkom sljedećeg u tri crnogorska grada održaće koncerte u sklopu turneje “Dva minuta”.

Iako usred priprema, bio je spreman da priča o svojim zahtjevima pred koncerte, šta ga inspiriše da napiše pjesmu, humanitarnim akcijama, planovima i svojim odavno poznatim stavovima da se karijera gradi trudom i ljubavlju, a ne uz pomoć tabloida. Ističe da se trudi da promijeni bar onaj dio svijeta u kojem živi

Pripreme pred koncert uvijek su teške i zahtjevne. Šta ti najteže pada i da li u pripreme spada i posjeta teretani ili se samo svodi na probe s bendom?

"Ovih dana imam malo vremena za teretanu, ali sam napunio baterije i našao vremena za odmor. Fizička aktivnost svela mi se na svakodnevne probe sa bendom koji moja publika dobro zna i probe sa ljudima iz organizacije oko tehničkih detalja. Zahvaljujući upravo tim probama sve je skoro spremno za koncerte."

Madona je pred svoj koncert tražila boce s kiseonikom, Rolingstoni puno leda i pepeljara, imaš li i ti takvih zahtjeva?

"Moji zahtjevi su sljedeći: 20 minuta tišine, flaša crnogorskog “vranca” i malo smijeha sa bendom pred izlazak na scenu."

Prije nego što si zapjevao "Dva minuta" u Areni, publika je imala priliku da čuje kako kuca tvoje srce. Da li će isto kucati i na koncertima po Crnoj Gori?

"U jednom trenutku dok sam držao mikrofon na grudima, gledao 18 hiljada ljudi u Areni učinilo mi se da svi mogu da čuju moju tremu i otkucaje moga srca, koje je prijetilo da iskoči. Moje srce kuca za moju publiku, u svim gradovima podjednako, jer bez publike ne bih bio tu gdje jesam i cijenim sve ono što radi za mene."

Nakon crnogorskog dijela turneje, nastavljaš sa koncertima po Bosni i Hercegovini. Kad planiraš odmor i kako uopšte "puniš baterije" od koncerta do koncerta?

"Ovim nastupima punimo baterije za koncerte u BiH. Nakon Crne Gore, slijede gostovanja u Sarajevu, Tuzli i još nekim gradovima u Bosni i Hercegovini.

Takođe imamo puno posla oko DVD snimka koncerta iz Arene koji ćemo promovisati i u ostalim republikama nekadašnje Jugoslavije i čiji će prihod od prodaje takođe ići u humanitarne svrhe. Možda neki novi spot i možda neka nova pjesma, kao singl i najava novog CD-a koji je planiran za 2013."

Uvijek na koncertima najmlađoj publici pjevaš "U svijetu postoji jedno carstvo". Da li je i tvoja ćerkica Lola već naučila tu pjesmu i koje joj druge dječije numere pjevaš?

"Kada ugledam dijete u publici nekako me uvijek povuče da zapjevam pjesmu koja je duboko utkana u moje djetinstvo.

Žalim što je program koji smo mi imali na televiziji zamijenila tona neukusa, nemorala i nasilja. Nije ni čudo što su današnja djeca, mnogo pametnija nego mi tada, tako brzo sazrijevaju i postavljaju sebi životne ciljeve i kriterijume nametnute iskrivljenom virtuelnom stvarnošću.

Opširnije u štampanom izdanju

( Marija Vasić )