Pas spašen nakon 3 nedjelje od cunamija vraćen vlasnici

Pas spasen 3 nedjelje poslije zemljotresa i cunamija koji su opustošili sjeveroistočnu obalu Japana, vraćen je vlasnici, prenio je BBC. Vlasnica dvogodišnje keruše po imenu Ban prepoznala je svoju ljubimicu u petak, kada ju je vidjela u jednom televizijskom prilogu. Japanska obalska straža spasila je kerušu koja je plutala na krovu kuće, oko 2 kilometra od mjesta Kesenuma u okrugu Mijagi, jednom od najteže pogođenih. Pretpostavlja se da se krov odvojio od kuće uslijed naleta cunamija, 11. marta, i da ga je voda odvukla u okean. Kada se vlasnica pojavila u azilu za spasene životinje, Ban je odmah počela da maše repom, prenijeli su lokalni mediji. "Nikada je nećemo napustiti", rekla je vlasnica koja je željela da ostane anonimna.

( Beta )