Broj žrtava u rudniku u Pakistanu povećan na 21

Još 15 tijela rudara je izvučeno iz urušenog rudnika uglja na jugozapadu Pakistana, čime se broj poginulih povećao na 21, rekao je jedan visoki pakistanski zvaničnik. U oknu, koje se urušilo zbog eksplozije metana, nalazi se još 31 rudar, a šanse za njihov opstanak veoma su sumorni, rekao je Iftikar Ahmed, jedan od glavnih inspektora za rudarstvo u Pakistanu. Prema njegovim riječima, mnogi rudari, čija su tijela do sada izvađena, ugušili su se od metana. Rudnik se nalazi u provinciji Baluhistan, na 40 kilometara istočno od njenog glavnog grada Kvete. U državnom je vlasništvu, s tim što je dat na upravljanje privatniku. Prije samo dvije nedjelje rudnik je proglašen rizičnim po bezbjednost ljudi. Upozorenje je, međutim, ignorisano.

( Beta )