Uhapšena tri turska novinara zbog navodne zavjere

U Turskoj su uhapšena tri novinara u okviru istrage o navodnoj zavjeri za svrgavanje konzervativne islamske vlade, prenijela je turska novinska agencija Anadolija. Soner Jalčin (45) vlasnik internet sajta Odatv.com i još dvojica novinara tog sajta, veoma kritičnog prema vladajućoj Partiji pravde i razvoja (AKP), izašli su pred sudije u Istanbulu koji su odlučili da protiv njih podignu optužnice. Oni će ostati u zatvoru do suđenja, javlja Beta. Policija je izvršila pretres kuća Jalčina i dvojice novinara početkom ove nedjelje nakon što su objavili video u kome se kritikuje policijska istraga navodne zavjere za rušenje vlade. Anadolija ne navodi za šta su optuženi, ali druge osobe koje su uhapšene u okviru takozvane afere Ergenekon, kako vlasti nazivaju navodni pokušaj političke destabilizacije i vojnog svrgavanja režima, optužene su za "pokušaj rušenja ustavnog poretka". Oko 400 ljudi, uključujući novinare, političare, profesore i penzionisane oficire optuženi su da su bili dio takozvane Ergenekon mreže u zavjeri za rušenje premijera Redžepa Tajipa Erdogana i njegove vlade. Erdogan je demantovao da vlada pokušava da ućutka novinare i rekao da oni kao i svi drugi mogu biti sudski gonjeni i da oni nemaju imunitet od zakona i poreza. Evropska unija i Komitet za zaštitu novinara (CPJ) optužili su Tursku da guši kritične medija i komentare o navodnoj zavjeri protiv vlade.

( Vijesti online )