Jeste li znali da je prvi auto bio na elektro pogon?
29. januara 1886. godine Karl Benz je podnio zahtjev za patentiranje svog automobila sa tri točka.Od tada se taj datum smatra zvaničnim danom rođenja automobila, koji danas slavi svoj 125. rođendan.
Zanimljivo je da je 5 godina ranije, na Internacionalnom Sajmu elektrike u Parizu 1881. pored novih izuma kao što je Edisonova električna sijalica, Belov telefon i električni tramvaj Vernera von Simensa, bio prikazan i prvi električni samovoz Gustava Truvea.
Na njegovu a i našu nesreću, ovaj se gospodin – za razliku od svojih savremenika – nije snašao na tržištu ni usavršio svojoj izum, pa se kao datum rođenja prvog automobila ipak bilježi 29. januar 1886. Za utjehu je da je na temelju izuma i rada Gustava Truvea u Londonu i Parizu 1911. bio organizovan električni taksi prevoz.
U istom periodu kada i Karl Benz, Gotlib Daimler je razvijao prvi automobil sa četiri točka. Na ovaj način, radeći nezavisno jedan od drugog, osnivači današnje kompanije Daimler AG i njenog osnovnog i globalno uspješnog brenda, Mercedes-Benza položili su kamen temeljac za sve današnje putničke automobile, teretna vozila i autobuse.
Kompanija koja je izumila automobil od tada nastavlja da ga razvija raznovrsnije i duže od bilo kojeg drugog proizvođača motornih vozila – u svim relevantnim sektorima, od pogonskih tehnologija, preko udobnosti i bezbjednosti, pa sve do dizajna.
Svoje ime Mercedes je dobio po imenu ćerke Emila Jelineka, austrijskog biznismena, velikog ljubitelja automobila i entuzijastičnog pobornika tehničkog napretka. Da li magija imena Mercedes, koje na španskom znači “milost”, ili pobjede koje je Jelinek ostvarivao na automobilskim trkama pod ovim pseudonimom, stvorile su masovno prihvatanje i prepoznavanje vozila sa trokrakom zvijezdom kao Mercedes vozila, zbog čega je naziv i zvanično bio usvojen 1926. godine.
Izuzetno praktičan Benz i nepokolebljivi Daimler, zajedno su utvrdili i proširili svoju vizijiu u sve segmente svakodnevnog života, omogućivši ne samo transport na kopnu, već i na vodi i u vazduhu, a time i značenje magičnog simbola trokrake zvijezde čiji kraci pokazuju na tri strane: vodu, vazduh i kopno.
Nakon više od 125 godina, spajanja, kriza i ratova, Mercedes-Benz je danas izbor predsjednika i kraljeva, predstavljajući kroz znak trokrake zvijezde univerzalni simbol za posebnost, prestiž, kvalitet, tradiciju, liderstvo i inovativnost.
( Dejan Jočić )