Ljosa glumi u komadu "1001 noć"
“Ne zaboravite da je prva stvar koju je napisao kad je imao 16 godina bio pozorišni komad”, kaže književnikov rođak.
Dobitnik Nobelove nagrade za književnost Mario Vargas Ljosa igraće sultana Šahrijara u sopstvenoj adaptaciji bajki iz “Hiljadu i jedne noći” koju će režirati njegov rođak Luis Ljosa.
Luis Ljosa je objasnio da književnik u Peruu provodi ljetnje mjesece na južnoj hemisferi i da će komad biti postavljen u martu, u otmenom ljetovalištu Asia, 100 kilometara južno od Lime.
Mario Vargas Ljosa (74) je posljednjih godina nekoliko puta igrao u pozorištu u Španiji gdje provodi najveći dio godine. Lusi Ljosa (59), televizijski, filmski i pozorišni režiser ispričao je peruanskim medijima da je “režirati komad sa nobelovcem u jednoj od uloga, isto kao da je riječ o bilo kojem drugom glumcu”.
“Odnos režisera i glumac je isti. Mario je čovjek otvoren za sva iskustva”, naveo je režiser.
“On ima glumačku žicu. Ne zaboravite da je prva stvar koju je napisao kad je imao 16 godina bio pozorišni komad”.