Durent: Boli me duša, ali gledati moju braću kako pobjeđuju je kao da sam popio čašicu tekile
"Dobio sam novi život", napisao je Durent
Jedan od najboljih košarkaša aktuelnog šampiona NBA lige Golden Stejt Voriorsa, Kevin Durent je "stisnuo zube" i izašao na teren u petom meču finala protiv Toronto Reptorsa u kojoj je na kraju njegov tim pobijedio sa 106:105 i tako smanjio na 3:2 u seriji.
Ipak, Durent koji je skoro mjesec dana bio van terena zbog povrede lista, ponovo se povrijedio, a ovog puta je stardala Ahilova tetiva.
Kako pišu američki mediji, Durent je navodno pokidao Ahilovu tetivu.
Ipak iz Golden Stejt Voriorsa još uvijek ne žele ništa zvanično da tvrde prije nego što Durent ode na magnetnu rezonancu.
Igrač Voriorsa je na Instagramu poručio da ga boli duša, ali da mu je ipak prijalo da gleda pobjedu svog tima.
Iako je najprije rečeno da Durent neće igrati peti meč serije, ali da trenira pred tu utakmicu, on je bio u postavi Voriorsa i ubacio 11 poena za 12 minuta koliko je proveo na parketu, a zatim se povrijedio i završio sezonu.
Poslije meča je poručio da ga "boli duša".
"Dab nacija će biti je*eno glasna u šestoj utakmici. Ne mogu da lažem boli me duša trenutno, ali gledati moju braću kako pobjeđuju je kao da sam popio čašicu tekile. Dobio sam novi život", napisao je Kevin Durent na Instagramu.
Durent će ići na magnetnu rezonancu u utorak, najavljeno je iz Golden Stejta, prenosi Sport Klub.
Po pisanju američkih novinara u Voriorsima se vjeruje da će mangnetna rezonanca samo potvrditi da je popularni KD pokidao Ahilovu tetivu.
"Radi se o povredi Ahilove tetive. Ne znam stepen povrede, sjutra će ići na magnetnu rezonancu. Radio je četiri nedjelje sa medicinskim timom i bilo je tu mnogo eskperata, doktora, mnogo magnetnih rezonanci i imali smo dobar osjećaj kada se radi o čitavom procesu", rekao je generalni menadžer Voriorsa Bob Majers kome je bilo veoma teško da govori nakon povrede Durenta.
"Mogao je da igra večeras, bila je to zajednička odluka. Nikoga ne možemo da krivimo, ali razumijem da u ovom svijetu je krivac uvijek potreban. Ja ovdje vodim košarkaške operacije i reći ću vam nešto o Kevinu, on voli da igra košarku i svi koji pričaju da on ne želi da se vrati ovom timu nisu u pravu. On je dobar saigrač, dobra osoba i to nije fer. Srećan sam što ga poznajem", dodao je Majers, prenosi Sport klub.
Prije meča protiv Toronta, Durent je posljednji put na terenu bio još u seriji sa Hjustonom početkom maja, a propustio je čak devet uzastopnih utakmcia.
Voriorsi su bez njega prošli Roketse i Portland Trejl Blejzerse, a Durent je mnogo nedostajao popularnim "ratnicima".
Šesti meč u seriji Golden Stejta i Toronta je u noći između četvrtka i petka u tri sata iza ponoći po našem vremenu.
( Vijesti online )