"Barbike" na svakom ćošku

Već nekoliko sati stojim nepomično ispred ogledala, gledam svoje oči, zatim vrat, struk, noge. Više ne vidim sebe, nasmijanu petnaestogodišnjakinju, već mi pogled zaklanjaju sve mane koje vidim pred sobom.

Nervozno cupkam nogom dok upoređujem svoj izgled s modelima, čije slike lajkujem svakodnevno po Instagramu. Zašto nemam njihov blistavi osmijeh, dugu sjajnu kosu i uzak struk? Zašto nisam savršena kao oni?

I šta uopšte znači biti lijep u savremenom dobu?

Drage djevojke, niste dovoljno lijepe − poruka je koju svakodnevno čujemo na sve strane.

Dok hodam hodnicima svoje škole, pažnju mi privlače, kako ih neki zovu, „plastične djevojke“, koje cijeli svoj život provedu u težnji za savršenstvom, u želji da ispune standarde koje im nameću njihovi „uzori“ na Instagramu.

Obično bih se osmijehnula i pogledala ih s blagim sažaljenjem, barem sam to radila dok nisam shvatila da nesvjesno radim isto i prepoznala da sam i ja zaslijepljena lažnom ljepotom i lažnim životima, pogotovo na društvenim mrežama, gdje je stvarnost uglavnom „fotošopirana“!

Prema istraživanju UNICEF-a i AEM-a u Crnoj Gori, svako drugo dijete imitira svoje uzore sa TV-a. Najveći uticaj na mlade uzrasta 12−17 godina u Crnoj Gori ima internet, i to najprije društvene mreže.

A da li svi oni znaju da se, na primjer, fotografije njihovih omiljenih junaka uređuju uz pomoć alata koji mogu omekšati linije, izbrisati bore, poboljšati crte lica, prekriti akne i promijeniti boju?

I da li stvarno svi želimo da izgledamo isto – kao „barbike”?

Zato, drage djevojke (i mladići) – imajte na umu da vašu ljepotu definiše vaš karakter, a ne vaš izgled.

I dok stojite u sobi i procjenjujete svoju „ljepotu”, kada vam pažnju skreću samo mane koje vidite na sebi, u ogledalo pogledajte očima pobjednika, a ne očima takmičara.

Samo onaj ko sebi prizna da je postao marioneta globalnog problema i odluči da prekine žice koje ga drže zarobljenim otkriće istinsku ljubav prema sebi.

Dakle, ne prihvatajmo slijepo sve što se nudi od strane loših i lažnih uzora.

Budimo svoji.

Budimo medijski pismeni.

( Jovana Popović )