Rangnik ne dolazi u Milan, Pioliju ugovor do 2022.
Njemcu je ponuđeno da zamijeni Paola Maldinija, ali je on to odbio
Od promjena u Milanu na kraju sezone nema ništa.
Dogovor Ralfa Rangnika i uprave "rosonera" je propao nakon što je milanski klub želio da mu da mjesto sportskog direktora, a ne trenera.
Rangnik i Milan su mjesecima unazad imali plan da iskusni Njemac preuzme brigu o kompletnom sportskom sektoru, da bude trener i osoba zadužena za transfere. Da se pita i da bude odgovoran za sve što se tiče ekipe koju vodi.
A onda, nakon dobre forme Milana pod komandom Stefana Piolija i odličnih rezultata po nastavaku prvenstva, planovi kluba kao da su se promijenili.
"Kiker" ističe da je Rangniku ponuđeno da naslijedi Paola Maldinija na mjestu direktora, što je ovaj odbio.
"Milan i Ralf Rangnik su odlučili da sada nije pravi momenat za saradnju. Ralf neće preuzeti nikakvu funkciju u klubu", navodi Rangnikov tim.
Sada je sve jasno - Pioli će produžiti ugovor do 2022. samim tim rastu šanse i da Zlatan Ibrahimović ostane na "San Siru".
( Vijesti sport )