Dalas slomio Kliperse bez Dončića, Toronto i Boston na 2:0

Iako je slovenački košarkaški mađioničar Luka Dončić zbog problema sa ličnim greškama odigrao samo devet minuta u drugom poluvremenu, njegov Dalas je savladao LA Kliperse sa 127:114, pa je rezultat u pobjedama plej-of serije poravnat na 1:1.

Ključna je bila završnica treće četvrtine kada je Dalas serijom 13:2 došao do 13 poena prednosti (98:85) prije završnih 12 minuta.

Dončić je upisao 28 poena, 8 skokova i 7 asistencija. Još petorica igrača Dalasa imala su dvocifren učinak u koševima, Porzingis je ubacio 23 poena, Tim Hardavej 17, Trej Burk 16, Set Kari 15, a Boban Marjanović 13.

Kliperse je predvodio najbolji igrač lige Kavaj Lenard sa 35 poena i 10 skokova. Lu Vilijams je dodao 23, a Pol Džordž 14.

Boston je poveo protiv Filadelfije sa 2:0 u pobjedama, a utakmica je prelomljena u trećoj četvrtini. Boston su predvodili Džejson Tejtum sa 33 i Kemba Voker sa 22 poena, dok je kod Siksersa najbolji bio Žoel Embid sa 34 poena.

Košarkaši Toronta ostvarili su i drugu pobjedu u prvom kolu doigravanja, svladavši Bruklin sa 104:99, pa branitelji naslova u seriji na četiri pobjede vode sa 2:0.

Sve do posljednje četvrtine Netsi su bili bliži pobjedi. Na početku četvrtog dijela utakmice vodili su sa 80:74, ali su Reptorsi posljednji period dobili 30:19.

Norman Pauel je s 24 poena podijelio epitet najboljeg strijelca Reptorsa sa Fredom Van Vlitom. Kajl Lauri je ubacio 21, a Paslal Sijakam je postigao 19 poena.

( Vijesti sport )