Planiraju da ima mjesta za sve
Administrativni odbor će u ponedeljak razmatrati inicijativu nove većine
Poslanički klubovi nove većine tražiće na sjednici skupštinskog Administrativnog odbora da se poveća broj članova radnih tijela.
“Vijestima” je izvor blizak vladajućoj većini rekao da su poslanički klubovi vladajućih koalicija podnijeli inicijativu, kojom traže da se poveća broj članova svih skupštinskih odbora na 13, a Komisije za privatizaciju na 14.
Skupština 25. saziva imala je po 13 članova odbora, dok je taj broj u prethodnom sazivu smanjen.
Predstavnici nove većine smatraju da bi se vraćanjem stare prakse lakše napravio raspored i uvažili svi poslanički klubovi.
Osim inicijative klubova poslanika „Demokratski front - NSD, DNP, UCG, RP“, „Demokrate - Demos - Mir je naša nacija“, „Demokratski front - PZP“, Socijalistička narodna partija i „Crno na bijelo“, na dnevnom redu sjednice Administrativnog odbora, koja je zakazana za ponedjeljak 17. novembra je, između ostalog pokretanje postupka imenovanja devet članova Državne izborne komisije, predloga odluke o razrješenju jednog člana Upravnog odbora Fonda za zaštitu i ostvarivanje manjinskih prava.
Do sada je od skupštinskih tijela formiran samo Administrativni odbor kojem poslanički klubovi treba da dostave predlog članova ostalih odbora.
Administrativni odbor ima 13 članova, a za njegovog predsjednika izabran je Milun Zogović (DF). Klubovi nove većine još nisu dostavili predloge za odbore jer čekaju konačno formiranje vlasti.
( Mila Radulović )