Dubljević prekinuo crni niz Valensije, slovenački fenomen srušio i prvaka Evrope
Luki Dončiću su dva skoka falila za tripl-dabl, jer je upisao 20 poena i 10 asistencija u pobjedi nad Fenerbahčeom u Istanbulu
Valensija je vezala 10 poraza u Evroligi, ali je konačno ugledala svjetlo na kraju tunela. I to zahvaljujući Crnogorcu - Bojan Dubljević je 36 sekundi prije kraja dao koš za 65:63 i otvorio put ka pobjedi nad Panatinaikosom (67:63).
Grci su pokušali da preokrenu, ali su promašili dva šuta, pa je Erik Grin sa linije penala postavio konačni rezultat.
Dubljević je meč završio sa 11 poena i četiri skoka, a Grin je bio najefikasniji sa 21. Kod "zelenih" je odskočio Met Lojeski (17).
Luka Dončić iz meča u meč pomjera granice.
Slovenački fenomen je još jednom zablistao i praktično sam donio Realu četvrtu vezanu pobjedu u Evroligi, a devetu ukupno, i to na gostovanju Fenerbahčeu (79:77).
Dončiću su dva skoka falila za tripl-dabl, jer je upisao 20 poena i 10 asistencija.
Uzgred, dao je i koševe odluke - dva minuta i dvije sekunde prije kraja je izborio faul Džejmsa Nanalija, a onda ga je u nastavku akcije udario i Jan Veseli, pa je 18-godišnjak dobio četiri bacanja. Pogodio je tri za 79:75, a do kraja je loptu kroz obruč probacio još samo Nikolo Meli za konačnih 79:77.
Fener je imao napad za produžetak ili pobjedu, ali je Bred Vonamejker postao tragičar, jer je prvo promašio trojku, a onda još dva šuta za dva poena.
Osim Dončića, dvocifren učinak u pobjedničkom timu su imali Trej Tompkins, Felipe Rejes (po 13) i Džejsi Kerol (11).
Kod domaćih je najefikasniji bio tragičar Vonamejker sa 20, Luiđi Datome je ubacio 12, Nanali 11, a Džejson Tompson 10 koševa.
Žalgiris je nastavio sa sjajnim rezultatima i protiv Olimpijakosa upisao peti vezani trijumf, 10. ukupno (74:68).
Tim iz Pireja je vodio 53:48 na ulasku u posljednju četvrtinu, ali su puleni Šarunasa Jasikevičusa posljednjih 10 minuta dobili 26:15 i zasluženo pobijedili.
Kevin Pangos i Arturas Milaknis su prednačili sa po 14 poena, jedan manje je za Grke dao Janis Papapetru.
Rezultati 15. kola
Valensija - Panatinaikos 67:63 (12:17, 20:15, 16:16, 19:15)
Fenerbahče - Real Madrid 77:79 (17:10, 19:27, 25:25, 16:17)
Žalgiris - Olimpijakos 74:68 (22:19, 14:19, 12:15, 26:15)
Makabi - Unikaha 78:89 (22:19, 25:20, 11:22, 20:28)
Petak
Himki - Barselona (18)
Anadolu Efes - Brose baskets (18.30)
Baskonija - CSKA (20.30)
Armani - Crvena zvezda (20.45)
( N. N. )