Estonija: Premijer dao ostavku, njegova partija pod istragom zbog korupcije
Predsjednica Kersti Kaljulaid ima rok od 14 dana da imenuje novog premijera koga zatim treba da odobri parlament
Estonski premijer Juri Ratas objavio je danas da podnosi ostavku pošto je njegova Partija centra pod istragom o korupciji vezanoj za jednu kompaniju za nekretnine.
"Danas sam donio odluku da podnesem ostavku kao premijer", napisao je Ratas koji je predsjednik te stranke, u poruci objavljenoj preko Fejsbuka poslije višesatnog sastanka.
Njegova ostavka povlači pad koalicione vlade desnog centra, u kojoj je takođe jedna partija ekstremne desnice.
Međutim, malo je vjerovatno da će biti održani novi izbori.
Predsjednica Kersti Kaljulaid ima rok od 14 dana da imenuje novog premijera koga zatim treba da odobri parlament.
Ratas je rekao da se nada da će njegova ostavka doprinijeti da se osvjetle sve okolnosti istrage o korupciji ali je naglasio da nije donio nikakvu zlonamjernu ili svjesno lošu odluku.
Istraga je usmjerena na kompaniju za nekretnine Porto Franko koja je dobila veliki zajam od države i zaključila profitabilan sporazum sa vlastima glavnog grada Talina, čiji je gradonačelnik takođe član Ratasove partije.
Otac vlasnika kompanije biznismen Hilar Teder je donirao značajne sume za Partiju centra.
"Kao predsjednik vlade nisam imao osjećanje u slučaju Porto Franka da su neki ministar ili neka partija pokušali da utiču na vladine odluke u nelegalnom smislu", rekao je Ratas.
Među drugim osumnjičenim u istrazi o korupciji su Kersti Kraht, savjetnik ministra finansija Martina Helmea iz ekstremno desničarske partije EKRE.
Ratasova ostavka bi mogla da zaustavi plan za održavanje spornog referenduma o homoseksualnom braku koji je koalicija namjeravala da organizuje na proljeće.
( BETA )