Božić kod kraljice Elizabete: Tradicija obavezna, ali i slatkiši

Britanska kraljica Elizabeta II velika je pobornica tradicije, a nje se posebno drži za vrijeme Božićnih praznika.

Cijela kraljevska porodica slavi ih zajedno, i to ne u Bakingemskoj palati. Božićno odredište je kuća Sandringem u Norfolku, gdje će im se ove godine pridružiti i Megan Markl, vjerenica princa Harija. To znači da će biti prekršeno kraljičino pravilo i tradicija koja kaže da proslavi Božića mogu prisustvovati isključivo članovi porodice, što Megan, prije vjenčanja s Harijem, službeno još uvijek nije.

Kraljica nema gomilu okićenih jelki. Imaju jedan veliki, prirodni bor kao i jedan srebrni, vještački u trpezariji koji koriste već trideset godina.

Misa na Božićno jutro je obavezna, a onda se svi vraćaju na raskošni ručak. I svake godine jedu isto, piše hrvatski portal 100posto.

Na kraljevskom prazničnom stolu nađe se tako salata s jastogom ili škampima, pečena ćurka s prilozima kao što su šargarepa, prokelj i drugo povrće. Ručak ne prolazi bez tradicionalnog "Božićnog pudinga", a kasnije svi zajedno gledaju prenos kraljičinog Božićnog govora.

Što se tiče večere, tu je tradicija malo popustila, pa se jelovnik svake godine mijenja. Ali, Elizabeta II ima jednu tradiciju koju ne propušta. To je, naime, jedini put u godini kad šef kuhinje uđe u trpezariju. Sječe meso koje je posluženo za večeru, a onda mu kraljica doda čašu viskija i nazdrave.

Nakon večere, vrijeme je za poklone, a tada se i svi opuste, jedu kolače i slatkiše.

Kraljica Elizabeta navodno jako voli čokoladu, i to posebno tamnu, pa se za Božić opusti i uživa.

( Vijesti online )