Fine lepinje zlatne boje: Filovane sirom i krompirom

Za fine lepinje punjene krompirom i sirom ne treba vam veliko kulinarsko umijeće, a imaćete zanimljiv obrok.

Sastojci:

• 400 ml toplog mlijeka
• 1 suvi kvasac (10 g)
• 1 kašika šećera
• 1 kašičica soli
• 2 kašike ulja
• 480 g brašna

Za fil:

• 5 krompira srednje veličine
• 100 ml mlijeka
• 200 g rendanog sira
• so

Za premazivanje:

• 1 žumance
• 1 kašika biljnog ulja
• susam i kim

Priprema:

Mlijeko, šećer i kvasac pomiješajte. Zatim dodajte pola količine brašna, promiješajte, pa dodajte ostatak brašna i so. Umijesite mekano tijesto. Dok mijesite dodajte ulje. Pokrijte i ostavite pola sata da odstoji.

Krompir skuvajte i zgnječite kao za pire. Zatim dodajte mlijeko i sir i dobro sjedinite. Podijelite tijesto i fil na tri dijela i oblikujte lopte.

Razvucite tijesto prstima u krug, pa stavite malo spljoštenu loptu od fila. Obmotajte tijesto oko fila i opet prstima rastanjite. Zatim stavite na pek papir oblikujte tanji krug. Ponovite postupak sa svim kuglama tijesta. Stavite na pleh i pokrijte, pa ostavite još malo da odstoji. Zatim prstima napravite udubljenja na tijestu (male rupice), pa premažite žumancetom i uljem i pospite susamom i kimom. Pecite na 180°C nekih 20 minuta.

( Vijesti online )