Milan u finišu izbjegao poraz nakon majstorije Kvaljarele i velike greške Ernandesa

Milan nije mogao više od boda protiv Sampdorije na San Siru (1:1) čime je vjerovatno ostao i bez posljednje nade da do kraja sezone pokuša da uhvati lidera i gradskog rivala.

"Rosoneri" mogu da budu i zadovoljni, jer su poraz izbjegli u finišu, iako su pola sata imali igrača više...

Velika greška Tea Ernandesa u 57. minutu i maestralna reakcija Fabija Kvaljarele promijenili su tok meča.

Ernandes je poklonio loptu iskusnom golgeteru, koji je odmah uočio da je Donaruma daleko od linije i poslao besprekoran lob u mrežu 0:1.

Dva minuta kasnije gosti su ostali sa deset igrača, nakon drugog žutog kartona Adrijena Silve.

Milan je zatim napravio pritisak, Rebićev udarac blokiran je na gol-liniji, da bi u 87. minutu Norvežanin Jens Peter Hauge lijepim golom donio izjednačenje.

"Mogli smo na kraju i da pobijedimo, ali sve vrijeme smo bili bez ritma i energije. Uradili smo premalo pred golom protivnika, učinili smo da odbrana Sampdorije djeluje previše sigurno", rekao je trener Milana Stefano Pioli.

U 93. minutu Milan je mogao i do preokreta, ali je Frank Kesi pogodio stativu.

Milan sa dvije utakmice više ima pet bodova manje od Intera.

( Vijesti sport )