Haradinaj: Igra sa granicama je opasna na Balkanu, ko god da se njima igra
"Ja uvijek putujem slobodno, čak i kad imam smetnje. Dio sam slobode mog naroda, doprinio sam slobodi i osjećam se slobodno. Ako bilo ko ima drukčije mišljenje o tome ne brinem previše pošto znam ko sam i odakle sam"
Premijer Kosova Ramuš Haradinaj izrazio je nadu da će demarkacija granice sa Crnom Gorom biti riješena i da će Kosovo konačno dobiti viznu liberalizaciju.
"Pričam sa građanima Kosova svaki dan, radim za njih 16 sati dnevno", rekao je u ekskluzivnom interjuu za DW Haradinaj.
On je rekao i da narod na Kosovu očekuje da Srbija, na kraju dijaloga Beograda i Prištine, prizna nezavisnost Kosova
"Za nas dijalog samo uz to ima smisla", rekao je on.
Na pitanje da li je moguća podjela Kosova koju otvoreno predlažu i neki političari iz Srbije, kosovski premijer je odvratio:
"Igra sa granicama je opasna na Balkanu, ko god da se njima igra. Ne vjerujem da su to ozbiljne priče i ne bih htio da o tome ikada pričam pošto znamo šta će slijediti ako se time igramo", rekao je on i dodao:
"Slijediće tragedije kojih se još uvijek sjećamo i nije pametno da o tome pričamo. Veoma je opasno".
Na pitanje da li će kao premijer imati probleme da putuje zbog potjernice iz Srbije, Haradinaj je rekao:
"Ja uvijek putujem slobodno, čak i kad imam smetnje. Dio sam slobode mog naroda, doprinio sam slobodi i osjećam se slobodno. Ako bilo ko ima drukčije mišljenje o tome ne brinem previše pošto znam ko sam i odakle sam".
Upitan da li će na Kosovu neko konačno odgovarati za zločine nad Srbima, Romima i drugim nealbancima, Haradinaj je rekao:
"Za to imamo sudove i tužilaštvo, u pravnoj smo državi i svako ima svoj mandat za svoj posao".
Dodao je: "Zakon je zakon, za sve počinioce i sve žrtve. To ćemo braniti. Ne odabiramo žrtve i počinioce već se povinujem Ustavu i zakonima".
( Vijesti online )