I dalje se traga za nestalim Splićaninom, pojavio se novi snimak
Snimak je navodno zabilježila kamera postavljena negdje ispred kluba „Gotik“ u Beton hali, gdje je Periš posljednji put viđen
Još jedan snimak sa sigurnosnih kamera zabilježen navodno kod Beton hale u Beogradu, gdje je prije pet dana nestao Matej Periš (27) iz Splita, pojavio se u javnosti. Na njemu se, međutim, vidi kako dvije osobe trče u nepoznatom pravcu, prenosi Nova.rs.
Snimak je navodno zabilježila kamera postavljena negdje ispred kluba „Gotik“ u Beton hali, gdje je Splićanin posljednji put viđen. Na njemu se, iako je lošeg kvaliteta, mogu razaznati dvije siluete kao trče u nepoznatom pravcu. Na snimku se takođe vide i parkirani automobili, ali se ne vidi gdje odlaze nepoznate osobe, piše portal.
Juče su se već pojavili snimci sa sigurnosnih kamera na kojima se vidi kako mladić trči. Za neke od njih otac Mateja Periša potvrdio je da je riječ o njegovom sinu, dok je demantovao da se Matej vidi na jednom od njih kako pliva Savom. Na snimku iz Travničke ulice vidi se kako najprije protrčava mladić u pantalonama i majici sa kratkim rukavima, a tridesetak sekundi kasnije i kako, u drugom smjeru, protrčavaju dvije osobe.
Nije poznato da li su te dvije osobe upravo dvije koje se vide na najnovijim snimcima.
Potraga za nestalim Splićaninom ušla je u peti dan i u angaživane su jedinice Ministarstva unutrašnjih poslova Srbije. Viđen je posljednji put u klubu "Gotik" u Beton hali, a njegovi drugovi su nestanak prijavili tek sjutradan u 18 sati.
( Vijesti online )