Miloš Mračević izabran za člana LEN biroa
Mračević je izabran na današnjem kongresu LEN u Frankfurtu, na kojem je za novog predsjednika LEN izabran Portugalac Žoze Silva,
Miloš Mračević, član UO Vaterpolo i plivačkog saveza Crne Gore za međunarodne odnose izabran je za člana LEN biroa, najvećeg izvršnog organa LEN (Evropska federacija vodenih sportova).
Mračević je izabran na današnjem kongresu LEN u Frankfurtu, na kojem je za novog predsjednika LEN izabran Portugalac Žoze Silva, dok su potpredsjednici Josip Varvodić iz Hrvatske, Krister Magnuson izu Švedske, Žil Sezional iz Francuske, Kirjakos Janopulos iz Grčke i Marko Trol iz Njemačke.
Pored Mračevića, u LEN birou su još Erkan Jalcin iz Turske, Even Kameron iz Švajcarske, Fernando Karpena iz Španije, Džek Bukner iz Velike Britanije, Noami Zvi iz Izraela, Peter Riška iz Češke, Pia Johanson iz Danske i Rokur Jakupstov sa Farskih ostrva.
"Posebno mi je drago što Crna Gora po prvi put ima predstavnika u najvećem izvršnom organu LEN-e, LEN birou. Ovo je veliko priznanje prije svega sa naš Savez i aktivnosti koje smo preduzeli na međunarodnom planu za koje sam bio zadužen nakon izbora Đura Marića za predsjednika VPSCG u čijem sam timu. Ponosan sam što sam prepoznat kao koristan član tima novog rukovodstva LEN, pred kojim je veliki rad i dosta odluka koje trebaju da donesu dobrobit, prije svega sportistima pet vodenih disciplina kao i svima onima koji na bilo koji način učestvuju u našim sportovima", poručio je Mračević.
Podsjećamo, FINA (Svjetska federacija vodenih sportova) je podržala kandidaturu novog predjsednika Portugalca Silve koji je nakon više godina smijenio Italijana Paola Barelija.
( Vijesti sport )