Vjerovali ili ne: Gibanicu možete napraviti i bez sira i bez mesa

Gibanica je mnogima omiljena pita i, premda postoji i varijanta sa mesom, najčešće se pravi sa sirom i jajima. Međutim, postoji i recept prema kojem 'zgužvanu' pitu možete napraviti i bez sira i bez mesa.

Sastojci:

• 1/2 kg kora za pitu
• 6 jaja
• 1 litar gustog jogurta
• 1 kašika soli
• malo ulja za podmazivanje tepsije
• (mjere su za tepsiju prečnika oko 30 cm)

Priprema:

Umutite jaja mikserom da malo zapjene. Dodajte jogurt (ostavite 3 – 4 kašike za premazivanje). Izmiješajte jaja i jogurt. Podmažite tepsiju uljem. Stavite jedan list kora u tepsiju. Stavite još jedan na njega, tako da prekriju dno tepsije i malo prelaze izvan ruba.

Uzimajte po pola kore, zgužvajte je, umočite u smjesu i stavite u tepsiju. Nemojte ih previše gurati jednu uz drugu. Kada popunite čitavu tepsiju, uzmite jednu koru, pa je podijelite na 3 dijela. Malo ih zgužvajte, pa rasporedite ponegdje preko umočenih kora. Nastavite sa umakanjem i redjanjem preko suvih kora, koje služe tome da se fil lijepo rasporedi kako pita ne bi bila gnjecava. Ostavite jednu koru za prekrivanje.

Zamotajte krajeve koji su virili sa strane tepsije preko natopljenih kora. Stavite preostalu koru od gore, malo je ušuškajte i premažite jogurtom koji ste izdvojili.

Pecite na 200°C najmanje pola sata. Kada gibanica porumeni, prekrijte je papirom za pečenje, pa pecite još 10 minuta.

( Vijesti online )