Čelsi izbrojao do šest u Sautemptonu, novi poraz Arsenala, Totenhem sam na 4. mjestu (VIDEO)

Iza Čelsija su dva teška poraza - od Brentforda i Real Madrida (4:1 i 3:1), ali je povratak na pravi put našao u Sautemptonu.

Ovakvu reakciju vjerovatno nije očekivao ni sam Tomas Tuhel - "plavci" su savladali "svece" čak 6:0, taj rezultat je bio na semaforu već nakon 54 minuta igre (poluvrijeme 4:0).

Tuhel je promiješao karte nakon lošeg izdanja kompletne ekipe protiv Reala, između ostalih lansirao u startnih 11 Tima Vernera i pogodio - Njemac je bio dvostruki strijelac, samo je u prvom dijelu pored pogotka tri puta tresao okvir gola.

Pored bivšeg napadača Lajpciga, upisivali su se i Markos Alonso, Kai Haverc i Mejson Maunt.

Arsenal je na poraz Mančester junajteda odgovorio na isti način - bolji od "tobdžija" je bio Brajton na "Emirejtsu" (2:1).

Leandro Trosar je donio prednost gostima u 28. minutu, sredinom drugog poluvremena je strijelac bio i Enok Emvepu.

Konačan rezultat je u 89. postavio Martin Edegor.

Arsenal je poražen drugi put zaredom, nakon što je u ponedjeljak lako pao na "Selhrst parku" protiv Kristal Palasa (3:0).

Poraze Arsenala i Junajteda je iskoristio Totenhem, koji igra u vrhunskoj formi.

Sparsi su se poigravali sa Aston Vilom u Birmingemu (4:0), pa su sami na 4. mjestu - sa tri boda više od Arsenala od kojeg imaju i utakmicu više.

Son je stigao do het-trika, Dejan Kuluševski je upisao po gol i asistenciju.

Hari Kejn nije bio strijelac, ali je učestvovao sa dvije asistencije.

Bitan trijumf u borbi za opstanak je ostvario Lids na gostovanju Votfordu - 3:0. Pogađali su Rafinja, Rodrigo i Džek Harison.

Lids je u seriji od četiri meča bez poraza (tri pobjede i remi).

( Vijesti sport )