Interu dovoljno pola sata: Perišić asistirao, Barela i Džeko zaprijetili Milanu i Napoliju (VIDEO)

Furioznih pola sata bilo je dovoljno Interu da savlada Veronu, izjednači se Napolijem i priđe na bod lideru Serije A Milanu.

Aktuelni šampion je pobijedio 2:0 na "Đuzepe Meaci" i podsjetio kako je u prvom dijelu sezone bez problema lako izlazio na kraj sa "malim" ekipama.

Inter je u prvom poluvremenu stvorio sedam-osam šansi, razbranio golmana gostiju Lorenca Montipa koji nije mogao ništa kod golova.

Prvi je atraktivno postigao Nikolo Barela u 22, drugi u 30. Edin Džeko. Kod oba je asistirao Ivan Perišić.

"Skudeto? Imamo pravo da vjerujemo ako budemo igrali kao u ovom meču. U februaru i martu rezultati nisu bili dobri, ali i dalje smo tu - Inter se ne predaje", rekao je Perišić.

Dvije asistencije je upisao sa pozicije lijevog ofanzivnog beka, posljednjih pola sata je bio napadač u tandemu sa Džekom.

"Promijenio sam dosta pozicija tokom karijere. Uvijek kada sam na terenu, bez obzira na kojoj poziciji, želim samo da pobijedim. Kada ovako trčimo kao protiv Verone, onda nema razloga da se plašimo", poručio je Hrvat.

Interovi rivali su na ispitu sjutra - Napoli od 15 sati čeka Fiorentinu, Milan od 20.45 gostuje Torinu.

( Vijesti sport )