Suvlaki: Grčki ražnjići sa salatom od krastavaca i jogurta

Suvlaki je tradicionalno grčko jelo - riječ je o komadima svinjskog, jagnjećeg ili pilećeg mesa koji su nanizani na tanke drvene štapiće i ispečeni na roštilju. Komadići mesa mogu biti kombinovani sa povrćem koje se niže između mesa.

Grčki ražnjići su, zbog začina, osvežavajuće neobičnog ukusa, a salata od krastavaca je sočna, svježa i lagana.

Sastojci:

• 600 g svinjetine ili drugog mesa po izboru
• 2 glavice crvenog luka
• 4 čena bijelog luka
• Suvi začini - nana, origano.., - po želji
• 1 limun
• 2 kašike maslinovog ulja
• 2 krastavca
• 2 dl grčkog jogurta
• Malo vinskog sirćeta
• So i biber

Priprema:

Isijecite meso za suvlaki na kocke, veličine 2 x 2 cm. Izrendajte 2 čena bijelog luka, dodajte nanu, origano, so, biber, maslinovo ulje i sok od limuna. Sve to promiješajte i utrljajte u meso. Štapiće za ražnjić najprije malo potopite u vodu (da ne gore) i potom na njih nanižite meso. Ražnjić spustite na dasku i pritisnite rukom da se izravna.

Crveni luk isijecite na trakice i stavite u zagrijani tiganj. Kada luk dobije boju u tiganj spustite ražnjiće i pržite ih oko 10 min.

Oljuštite krastavac i ljuštilicom napravite trakice. Sredina je puna vode i ne koristi se. Posolite ga i ostavite da pusti vodu.

Izgnječite dva čena bijelog luka. Dodajte so, suvu nanu i nekoliko kapi vinskog sirćeta.

Sjedinite krastavac, smjesu sa bijelim lukom i jogurt i sve promiješajte. Salatu možete dekorisati listićima svježe nane i dodati malo maslinovog ulja.

( Vijesti online )