Raičević povukao kandidaturu: Administrativni odbor ni danas nije izabrao zamjenika predsjednika tog tijela
Predsjednica odbora Suzana Pribilović kazala je da je na pretprošloj sjednici dogovoreno da se dostave predlozi za njenog zamjenika i da je to učinio samo klub DF-PZP, predloživsi Raičevića
Administrativni odbor ni danas nije izabrao zamjenika predsjednika tog radnog tijela, s obzirom da je poslanik Pokreta za promjene Vladan Raičević, koji je bio jedini predloženi, povukao kandidaturu.
On je to učinio nakon izlaganja poslanika Demokrata Vladimira Martinovića, koji je tražio da se ta tačka povuče sa dnevnog reda dok se ne postigne dogovor među poslaničkim klubovima vlasti i opozicije, kome će pripasti koji odbor.
"Nema dogovora za raspodjelu odbora, zamjenika i predsjednika i članova. Trazim da šefovi klubova održe kolegijum, jer je ovo presedan",rekao je on.
Odbor je jednoglasno odlučio da se sa dnevnog reda povuče tačka o imenovanju zamjenika tog radnog tijela.
Predsjednica odbora Suzana Pribilović kazala je da je na pretprošloj sjednici dogovoreno da se dostave predlozi za njenog zamjenika i da je to učinio samo klub DF-PZP, predloživsi Raičevića.
Nakon što je Raičević odustao, ona je kazala da ne želi da ide poruka sa odbora da ona bilo šta sili, već da je na dnevni red stavila tu tačku, jer je stigao predlog.
( Željka Vučinić )