Dva igrača - 82 poena, Lejkersi tonu - Lebron obara rekorde

Nikola Jokić imao je skromnu noć, znatno ispod svojih standarda, ali je Denver bio bolji od Jute 117:101.

Jokić je ubacio 12 poena (3/10 iz igre), uhvatio deset skokova i upisao šest asistencija za 25 minuta.

Nagetse je ovoga puta vodio Bouns Hajland sa 26 poena, Majkl Porter je ubacio 22, a Džamal Marej 13 za siguran trijumf u 4-2 u prvih šest mečeva sezone.

Noć u NBA ligi obilježio je tandem Klivlenda Karis Levert i Donovan Mičel, koji su zajedno upisali čak 82 poena (po 41) u pobjedi svog tima nad Boston u gostima nakon produžetka - 132:123.

Jedina dva igrača Kavsa koji su prije njih imala po najmanje 40 poena u jednom meču bile su legende Lebron Džejms i Kajri Irving.

Levert je ubacio šest, Mičel pet trojki, obojica su imala procente šuta iznad 50 odsto.

Klivlend je upisao četvrtu pobjedu, uz jedan poraz, Boston ima skor 3-2.

U timu Seltiksa, 32 poena zabilježio je Džejlen Braun.

Lejkersi tonu, doživjeli su i peti uzastopni poraz, još su na nuli.

Ovoga puta izgubili su od Minesote 111:102.

U novom neuspjehu, Lebron Džejms je oborio rekord po broju mečeva u kojima je upisao 20 i više poena - 1.135. put je bio na plus 20 (imao je 28), pretekavši Karima Abdula Džabara.

Timbervulvse je do pobjede vodio Entoni Edvards sa 29 poena.

Lejkersi su uz Sakramento jedina ekipa bez pobjede, s tim da Kingsi imaju meč manje.

Portland je nastavio odličnu sezonu (5-1), savladao Hjuston 125:111, iako je igrao bez Demijena Lilarda.

Anferni Sajmons je postigao 30 poena, a blistao je Jusuf Nurkić sa 27 poena i 15 skokova.

( Vijesti sport )