Prilika za Lulu da očisti ukaljanu zaostavštinu
Nakon četiri godine krajnje desničarske vladavine Žaira Bolsonara, Lula da Silva kaže da će njegov prvi prioritet biti pomoć 100 miliona Brazilaca koji žive u siromaštvu
Euforija izborne pobjede jenjava i dok se mnogi Brazilci bude mamurni nakon što su slavili poraz Žaira Bolsonara, novoizabranog predsjednika Injasija Lulu da Silva očekuju nove glavobolje.
Lula prezima vlast 1. januara 2023. godine i biće zadužen za obnovu i ujedinjenje zemlje koja je duboko podijeljena nakon četiri godine Blosonarovih anarhističkih desničarskih politika.
Izazovi su brojni, navodi britanski “Gardijan” i dodaje da su 33 miliona Brazilaca suočena sa akutnom glađu a 100 miliona živi u siromaštvu, što je najveći broj posljednjih godina. Zbog Bolsonarovih politika naročito onih u Amazoniji, Brazil je postao međunarodni odmetnik.
Lula se pozabavio ovom i nizom drugih tema u pobjedničkom govoru, ali je jasno stavio do znanja da je njegov glavni politički cilj unapređenje života siromašnih Brazilaca.
”Ne možemo prihvatiti kao normalno da u ovoj zemlji milioni muškaraca, žena i djece nemaju dovoljno da jedu”, kazao je on svojim pristalicama nakon objave rezultata. “Ako smo mi treći po veličini proizvođač hrane na svijetu i najveći proizvođač životinjskih proteina... naša dužnost je da garantujemo da svaki Brazilac ima doručak, ručak i večeru svakog dana”.
Povratak veteranskog ljevičara
Lula je pobjedom u nedjelju osvojio treći predsjednički mandat u izuzetnom političkom povratku nekadašnjeg prvog predsjednika iz redova radničke klase, čija je politička karijera u jednom trenutku zamalo završila zatvorom.
Bivši radnik u industriji za preradu metala rođen u farmerskoj porodici nepismenih roditeja, Lula je već četiri decenije centralna ličnost brazilske politike, otkad je predvodio štrajk sindikata protiv vojne diktature 1980-ih i formirao ljevičarsku Radničku partiju.
Lula je tijesnu pobjedu nad desničarem Žairom Bolsonarom u drugom krugu izbora u nedjelju nazvao “vaskrsenjem”, nakon što je završio u zatvoru u najvećem brazilskom korupcionaškom skandalu nakon njegova dva predsjednička mandata od 2003. do 2010.
”Pokušali su živog da me sahrane, a ja sam ovdje da upravjam zemljom”, kazao je on u sjedištu kampanje u nedjelju veče.
Ovaj 77-godišnjak, čija su nekada čupava kosa i prepoznatljiva brada posijedile, oslanjao se na neprevaziđene političke instinkte i harizmu da bi prevazišao snažni skepticizam svoje Radničke partije, koja je posmatrala duboku recesiju i ogroman korupcionaški skandal koji je na kraju doveo Bolsonara na vlast, navodi Rojters.
Lula je obećao da će poništiti Bolsonarovu zaostavštinu, uključujući i politike koje podržavaju nošenje oružja i oslabljenu zaštitu životne sredine u Amazoniji, zbog čega je ova najveća latinoamerička zemlja sve više izolovana globalnoj sceni.
Čovjek, kojeg je bivši predsjednik Barak Obama u jednom navratu nazvao “najpopularnijim političarem na Zemlji” napustio je dužnost prije 12 godina sa rekordnom podrškom od 87 odsto. Njegove politike su milione Brazilaca izvukle iz ekstremnog siromaštva, proširile pristup obrazovanju u zdravstvenoj njezi i smanjile duboke brazilske društvene nejednakosti tokom godina snažnog rasta podstaknutog gobalnim robnim bumom.
Globalni prestiž
Tokom njegovih predsjedničkih mandata oživjele su brazilska naftna industrija kao i brodogradnja, dok je ekonomija postala šesta u svijetu. Globalni prestiž Brazila je dostigao novi nivo nakon što je ta zemlja izabrana za domaćina Olimpijskih igara i Svjetskog prvenstva.
Međutim, Lulina zaostavština je ukaljana usljed otkrića o korupciji prilikom održavanja javnih tendera od kojih su najveće koristi imali lideri velikih političkih partija, uključujući i njegovu. Taj skandal i duboka recesija 2015-2016. doprinijeli su stvaranju atmosfere koja je rezultirala opozivom njegove nasljednice, koju je lično birao, bivše predsjednice Dilme Rusef.
Luli se takođe sudilo zbog primanja nekretnina i drugih poklona kao mito od građevinskih kompanija. Osuđen je 2017. na devet i po godina zatvora, podsjeća Rojters.
Zbog presude bilo mu je zabranjeno da se kandiduje za predsjednika 2018, kada je Bolsonaro pobijedio na talasu reakcije konzervativaca i antipatije prema Radničkoj partiji.
Bivi predsjednik je oslobođen nakon 19 mjeseci, a brazilski Vrhovni sud je poništio presudu nakon što je utvrđeno da je sudija koji je nadgledao njegovo krivično gonjenje bio pristrasan. Lula je uvijek odbacivao optužbe i tvrdio da su mu njegovi neprijatelji smjestili kako bi ga uklonili iz brazilske politike.
Lula se vratio iz zatvora kao pragmatični političar koji obećava borbu protiv gladi i nezaposlenosti kanalisajem državnih kredita i investiranjem u strateške industrije, pritom obećavajući fiskalnu odgovornost.
Lula je obećao da će privući strane investicije obnovom brazilskog kredibiliteta kao čuvara Amazonije, gdje je Bolsonaro dozvolio da sječa šuma dostigne rekordni nivo u zadnjih 15 godina.
Lula je ublažio ljevičarski imidž u posljednjoj fazi kampanje, zamijenivši svijetlo- crvene boje Radničke partije za bijelu odjeću i često citirajući Bibliju kako bi dopro do sve veće jevanđelističke hrišćanske zajednice.
Nakon što mu je prva supruga preminula dok je bio u zatvoru, Lula se prošle godine ponovo oženio sociološkinjom Rosanđelom da Silvom. Strastveni pušač, Lula je liječen hemoterapijom zbog raka grla 2011. godine.
Slavlje ljevičara u regionu
Širom regiona juče se slavila Lulina pobjeda, dok su jevičarski saveznici upućivali čestitke. “Viva Lula”, objavio je na Tviteru kolumbijski lider Gustavo Petro.
Predsjednik Argentine, Alberto Fernandez, slavio je “novu euru u istoriji Latinske Amerike”. “Era nade i budućnosti koja počinje odmah”, naveo je on.
Predsjednik Meksika, Andres Manuel Lopez Obrador odao je priznanje onome što je nazvao pobjedom “jednakosti i humanizma”.
Predsjednik Sjedinjenih Država Džo Bajden je objavio saopštenje u kojem čestita Luli na pobjedi nakon “slobodnih, fer i kredibilnih izbora”. “Radujem se zajedničkom radu kako bismo nastavili saradnju između naše dvije zemlje u mjesecima i godinama pred nama”, naveo je predsjednik SAD.
Francuski predsjednik Emanuel Makron kazao je da Lulin izbor “predstavlja početak novog poglavlja u istoriji Brazila”, dok je predsjednik Španije Pedro Sančez nazvao Lulinu pobjedu korakom ka “napretku i nadi”.
Brza međunarodna reakcija je poruka Bolsonaru
Brzina međunarodne reakcije odražava rasprostranjene strahove da Bolsonaro, bivši vojni kapetan koji je proveo godine napadajući brazilske demokratske institucije, može odbiti da prizna poraz. Uoči izbora on je kazao da će osporiti rezultat koji bude smatrao “nenormalnim”.
Ispred Bolsonarovog doma u zapadnom dijelu Rio de Žaneira vijest o njegovom izbornom porazu razočarala je mnoge. “Ljuta sam”, kazala je za “Gardijan” Minik Almeido, 36-godišnja kozmetičarka. “Ne znam šta da kažem”. Žoao Reis, 50-godišnji električar, kazao je da je uvjeren da su izbori pokradeni.
”Ovo je prevara nema sumnje u to. Manipulisali su brojanjem glasova. Oružane snage moraju intervenisati”, kazao je on i dodao da ukoliko se to ne desi stanovnici treba da izađu na ulice “i zahtijevaju vojnu intervenciju kako vlast ne bi došla u ruke komunista”.
Na skupovima podrške Luli raspoloženje je bilo drugačije dok je veteranski ljevičar najavio rat protiv glad, rasizma i borbu protiv razaranja životne sredine. “Borićemo se protiv sječe šuma u Amazoniji... Brazlu i planeti je potrebna živa Amazonija”, kazao je on.
( Nada Bogetić )