Ako volite jače ukuse: Piletina sa paprikama i gorgonzolom

Ovo je Idealan recept za prave gurmane i one koje vole jake i oštre ukuse. Uz slaninu, kobasicu, bijeli luk i gorgonzolu piletina se pretvara u pikantno jelo koje će se dopasti svima koji vole jaka jela. Stranica Moja mala kuhinja objavljuje recept za dvije osobe, vi količine prilagodite svojim potrebama.

Sastojci:

• 1 veća svježa crvena paprika
• 1 veći crni luk (oko 80 g)
• 350 g pilećih prsa
• 100 g listića slanine
• 100 g ljute kobasice (po želji)
• 100 g gorgonzole
• bijeli luk
• so, biber i vegeta po potrebi

Priprema:

Zagrijte tiganj na laganoj vatri i dodajte listiće slanine. Vatra mora da bude lagana da se listići slanine ne preprže već je potrebno da se samo malo skupe. Poslije dva minuta dodajte sjeckanu svježu crvenu papriku. Promiješajte i nakon jednog minuta dodajte sjeckani crni luk. Poklopite i dinstajte pet minuta.

Nakon što su luk i paprika malo omekšali dodajte piletinu da se dinsta. Sipajte malo soli i vegete, ali imajte u vidu da će vam slanina i ljuta kobasica već biti dosta slane pa smanjite količinu soli na minimum dok vam jelo nije gotovo. Dodajte čašu vode i poklopite. Dinstajte nekih pola sata uz dodavanje po malo vode ako je potrebno.

Dodajte sjeckanu ljutu kobasicu i nastavite kuvanje oko 15 minuta. Nakon što je jelo skuvano, dodajte gorgonzolu isječenu na komadiće. Poklopite na dva minuta da se gorgonzola otopi., na kraju promiješajte.

Servirajte na uz običnu rižu kuvanu na vodi.

( Vijesti online )