Gol i asistencija Salaha, Liverpul slavio protiv Aston Vile
Liverpul pobijedio Aston Vilu 3:1
Fudbaleri Liverpula upisali su pobjedu na Boksing dej - ekipa Jirgena Klopa je večeras u gostima savladala Aston Vilu 3:1 u 17. kolu Premijer lige.
"Redsima" je ovo treća pobjeda zaredom u Premijer ligi.
Liverpul je poveo već poslije pet minuta. Nakon jednog kornera lopta je došla do Aleksander-Arnolda, koji je sjajno pronašao Endija Robertsona, a škotski reprezentativac asistirao Mohamedu Salahu za vođstvo.
Robertson je večeras postao defanzivni fudbaler sa najviše asistencija u istoriji Premijer lige - 54. Dosadašnji rekorder bio je Lejton Bejns.
Na 2:0 povisio je Virdžil van Dajk u 37. minutu poslije asistencije Salaha i to je bio rezultat prvog dijela.
Mogao je Liverpul da ima ubjedljiviju prednost poslije 45 minuta, ali je Darvin Nunjes u nekoliko navrata bio neprecizan.
Na startu drugog dijela Oli Votkins je postigao gol, koji je poništen zbog ofsajda, a onda je u 59. minutu drugi gol engleskog fudbalera priznat, pa su domaći smanjili.
Imala je Vila još šansi, dobru priliku nije iskoristio Megin koji je loše glavom šutirao, iako je bio sam, dok je na drugoj strani ponovo neprecizan bio Nunjes.
Konačan rezultat postavio je rezervista Stefan Bajčetić u 81. minutu.
( Vijesti sport )