Dragić i Dončić mogu sve: Slovenija zaustavila leteće Letonce

Slovenija je u polufinalu Eurobasketa - u najboljoj utakmici šampionata, tim Igora Kokoškova savladao je Letoniju 103:97.

U meču sjajnog ritma, rezultatskih preokreta, izuzetnih individualnih partija dva NBA asa i jedne nove zvijezde svjetske košarke, presudile su nijanse.

Slovenci su vodili u većem dijelu meča, pokazali izuzetan karakter i timski duh, kada je rival uspio da preokrene. A imaju dva čudesna igrača, dva velika lidera - Gorana Dragića i Luku Dončića, koji su preuzimali odgovornost u teškim momentima, i uz koje je i cijeli tim bolji, i pruža možda i više nego što realno vrijedi...

Dončić je postigao 27 poena (devet skokova), Dragić jedan manje, ali imao i osam asistencija i šest uhvaćenih lopti.

Entoni Rendolf je bio izuzetan sa 16 poena i devet skokova, a Klemen Prepelič postigao 17, od čega 12 sa linije bacanja, bez promašaja.

Kristaps Porzingis je bio najefikasniji igrač meča sa 34 poena, Davis Bertans ubacio 23.

Slovenija je odigrala savršenu napadačku četvrtinu u prvih 10 minuta - šut iz igre 75 odsto, pet trojki iz sedam pokušaja i čak 34 poena.

Zastrašujuće brojke donijele su im prednost 30:15, a na kraju prvohg perioda imali su 11 poena razlike u svoju korist 34:23.

Goran Dragić je već imao 13 poena, uz tri asistencije.

Teško je bilo očekivati da će momci Igora Kokoškova zadržati takav učinak u napadu, ali i da će potpuno zaustaviti Kristapsa Porzingisa.

Letonski superstar je vodio svoj tim u prvom dijelu drugog perioda, ali je morao da izađe sa parketa, jer je nakupio tri lične greške.

Gdje je on stao nastavila su braća Bertans i Tima, pa je Letonija serijom 8:0 u posljednji minut poluvremena ušla sa tri poena prednosti, a nakon trojke Blumsa, osme u prve dvije četvrtine, na odmor utišli sa 55:51...

Slovenija je za tri minuta i po minuta treće četvrtine napravila seriju 11:0, preokrenula, a do kraja povećala prednost na 12 razlike (76:64), nakon strahovitog zakucavanja Gašpera Vidmara.

Letonci su izgubili konce bez Porzingisa, koji je veći dio tog perioda proveo na klupi zbog četiri faula...

Nije, naravno, bilo gotovo. Letonija ima šutere, koji za kratko vrijeme mogu potpuno da preokrenu tok meča, ali je slovenačka odbrana bila dobro postavljena i organizovana da njihov ofanzivni potencijal pokuša da umanji na najmanju moguću mjeru...

U jednom periodu nije uspjela u tome, rival je smanjio na minus dva, ali je onda stvar u svoje ruke uzeo Luka Dončić i sa dvije trojke iz teških pozicija vratio Sloveniju na plus osam (91:83)...

Imala je Letonija snage da priđe na minus dva, ali je maestralni Dragić pogodio za 97:92 na 30 sekundi prije kraja...

( Vijesti sport )